Балық та – береке бастауы

Жеңді білектей қазы мен туырылып түскен қартаға аңсары ауып тұратын ағайынның бағалы балыққа да қарық болатын түрі бар. Балық болғанда да балаң үйректің басындай шабақ емес, дәмі тіл үйіретін форель.

Бурабай ауданындағы Ақыл­бай кентінде орналасқан «Био­сфера fish» ЖШС форель шар­уа­шылығын ұйымдастырып, бұл өңірде бұрын-соңды кездесе қоймайтын бағалы балықты кө­бейтпек. Тіпті таяу арада өңір­де сауда сөрелеріне көптеп түседі деген үміт те бар.

– Балық өсіретін кешеннің құрылысы былтыр наурыз айында басталған болатын. Негізін­де балық та бап тілейді. Қыр-сырын қапысыз меңгеру қажет. Сондықтан кешенде жұмыс істейтін қызметкерлер Қазан, Ростов, Санкт-Петербург қала­ла­рында осы саланың ерек­ше­­лік­терін егжей-тегжейлі оқып, үйреніп қайтты. Тамыз айын­да шабақтарды бассейнге жі­бердік. Алғашқы форель уылдырығы Франциядан жет­кі­зілді, – дейді шаруашылық директорының орынбасары Павел Стадников, – таяу арада тауарлық салмаққа жеткен соң сатылымға шығарылады. Жалпы, бес тонна форель өнді­ру­ді межелеп отырмыз. Ал биыл бастап өнім көлемі 40-45 тон­на­ға жеткізіледі.

Мұнда 8 бассейннің әрқай­сы­сында шамамен бір жа­рым­ға жуық балық өсіріледі. Бас­сейн­де­гі су үнемі жаңар­ты­лып отырады. Өйткені форель балығы тазалықты сүйеді. Әрі су озонмен байытылады. Зертханалық сараптамалар күніне үш рет өткізіледі. Судың құрамы мен тем­пературасы стандартқа сай болуы керек. Демек бұл ба­ғыт­тағы жұмыс та оңай-оспақ шаруа емес.

– Мемлекеттік инвестиция­ларды тарта отырып, екінші блокты салуды межелеудеміз. «Аграрлық несие корпорация­сы» АҚ-ға өтінім бердік. Сол кезде бір жылда жүз тоннаға дейін форель өндіре алар едік, – дейді П.Стадников.

Бурабайдың баурайында форель өсіру бұл бағыттағы ал­ғашқы инвестициялық жоба. Кешенді салып шығу үшін 360 млн теңге төңірегінде жеке ин­вестиция тартылған. Бір жақ­сысы, балық өсіру туралы бас­тама мемлекеттің қолдауына ие болуда. Нақтырақ айтсақ, са­­лынған қаржының 25 пайызы қайтарылады.

Цели­но­град ауданындағы Ақ­қайың ауылында «Посейдон» серік­тес­тігі де дәл осындай ба­лық шар­уа­шылығын қолға алуды жос­парлап отыр. Ойға алған шаруа оңынан оңғарылса, Ақ­қайыңда да жылына 100 тоннаға жуық форель мен бекіре өсіруге мүм­кіндік туып отыр. Несі бар, осындай нәтижелі шаруалар жү­зеге асырылса, астананы азық-түлікпен қамту бел­де­уін­дегі өңірдің бұл ба­ғыт­тағы өңі жақсарып, дастар­ханның берекесі кіріп қалар еді.

Ақмола облысы,
Бурабай ауданы