Үкіметте жаңа электрондық платформалар талқыланды

Премьер-министр Әлихан Смайыловтың төрағалығымен Үкіметте Цифрландыруды енгізу мәселелері жөніндегі комиссияның кезекті отырысы өтті, деп хабарлады Halyq Uni тілшісі.

Ауыл шаруашылығы министрі Ербол Қарашөкеев жыл басынан бері республикада Субсидиялаудың бірыңғай мемлекеттік ақпараттық жүйесі (СБМАЖ) іске қосылғанын, ол бұған дейін егіншілердің сынына ұшыраған осыған ұқсас жекеменшік платформаның орнына енгізіліп отырғанын баяндады.

Бүгінде СБМАЖ 1 млрд теңгеден аса соманы үнемдей отырып, барлық фермерлер үшін мемлекеттік субсидияларды тегін бөлуді қамтамасыз етіп жатыр. Ашықтықты қамтамасыз ету үшін кезек беріліп, өтінімдердің бірыңғай тізілімі (күту парағы) енгізілді. Сондай-ақ облыстар мен субсидиялар бойынша «жария бюджет» функциясы іске қосылды. Сонымен қатар платформада арзандатылған дизель отынын алуға өтінімдер қабылданады. Пайдаланушыларға ыңғайлы болу үшін кері байланыс арналары жолға қойылған: мемлекеттік қолдау алу туралы сұрақтарды мессенджер арқылы жіберуге немесе call-орталыққа хабарласуға болады. Жалпы, жартыжылдықтың қорытындысы бойынша СБМАЖ-ға 50 мыңнан аса адам тіркеліп, жүйе арқылы 88 мыңнан аса өтінім берілді және 112 млрд теңгеден аса қаражат төленді.

Премьер-министр Ауыл шаруашылығы министрлігі платформаның функционалына қатысты «Атамекен» ҰКП-ның барлық ескертуін назарға алу керектігін, ал облыс әкімдіктері уақтылы субсидиялар төлеп, фермерлермен бірге жыл соңына дейін «Қазақстан Ғарыш Сапары» порталында егіс алқаптарын цифрландыру қажеттігін атап өтті. Сонымен қатар жаңадан құрылған облыстардың әкімдіктеріне СБМАЖ жүйесінде фермерлер алдындағы міндеттемелерді қабылдау жөніндегі жұмысты шілде айының соңына дейін аяқтау тапсырылды.

Отырыста цифрлық даму, инновациялар және аэроғарыш өнеркәсібі министрі Бағдат Мусиннің биылғы маусымнан бастап мемлекет басшысының тапсырмасын орындау аясында әзірленген «minerals.gov.kz» Жер қойнауын пайдаланушылардың бірыңғай платформасын пайдалануға беру туралы есебі тыңдалды.

Платформа мемлекеттік функцияларды автоматтандыру арқылы пайдалы қазбаларды барлауды немесе өндіруді іске асыруға лицензия беру үдерісін жеңілдетуге және жеделдетуге арналған. Платформа арқылы болашақ жер қойнауын пайдаланушылар (инвесторлар) оның инфрақұрылымы, қаншалықты зерттелгені және қолданыстағы келісімшарттардан бастап, геологиялық және геофизикалық деректерге дейін толық ақпарат ала алады.

Осылайша, жер қойнауын пайдаланушылар жүйеде жеке кабинет ашып, пайдалы қазбаларды барлауға немесе өндіруге өтініш бере алады, сондай-ақ мемлекеттік органдардан түрлі хабарламалар алып отырады. Платформа бойынша жұмыс жалғасуда, жақын арада геологиялық деректер мен есептерді цифрландыру және жүктеу, сондай-ақ бірқатар басқа да мәліметті өзектендіру көзделген.

Отырыс аясында Қоршаған орта мен табиғи ресурстардың жай-күйі туралы ұлттық деректер банкін құру мәселесі де қаралды. Экология министрлігінің басшысы Зүлфия Сүлейменова бүгінде пилоттық режимде қоршаған ортаға бөлінетін эмиссия мониторингінің автоматтандырылған жүйелерінен алынған деректерді, қатты тұрмыстық қалдықтарды жинау полигондары мен бекеттері туралы мәліметтерді, атмосферадағы ауаның жай-күйін және т.б. жинақтайтын интерактивті карта іске қосылғанын баяндады.