— Батыс Қазақстан облысында Бөрлі, Қаратөбе, Сырым, Теректі, Тасқала аудандары мен Орал қаласында су тасқынынан зардап шеккен тұрғындарға әлеуметтік көмек көрсетіліп жатыр.
БҚО жұмыспен қамтуды үйлестіру және әлеуметтік бағдарламалар басқармасы басшысының орынбасары Ділдәш Исқақованың өңірлік коммуникациялар қызметі алаңында өткен брифингте мәлім еткеніндей, аудандық және қалалық мәслихаттардың шешімдерімен бекітілген «Әлеуметтік көмек көрсетудің, оның мөлшерлерін белгілеудің және мұқтаж азаматтардың жекелеген санаттарының тізбесін айқындаудың қағидаларына» сәйкес жергілікті бюджет қаражаты есебінен дүлей апаттың немесе өрттің салдарынан зардап шеккен азаматтарға (отбасына) осы жағдай туындаған кезден бастап үш ай ішінде, табыстарын есепке алмай, 50 (елу) айлық есептік көрсеткіштің шекті мөлшерінде, біржолғы әлеуметтік көмек көрсету қарастырылған.
Ділдәш Салауатқызының сөзіне қарағанда, су тасқынынан 1 171 отбасы, 4 168 адам (соның 1 252-сі – балалар, 405-і – зейнеткер, 78-і – мүгедектігі бар адамдар, 87-сі – көпбалалы отбасылар) зардап шекті.
«Қазіргі таңда 375 отбасына 69,2 млн теңге, олардың әрқайсысына 50 АЕК (184 600 теңге) мөлшерінде біржолғы әлеуметтік көмек көрсетілді. Бұл төлемдер жалғастырылуда. Зардап шеккендерден өтініштер қабылданып, актілер жасалуда. Тұрғын үйлері су тасқынынан зардап шеккен 17 отбасына атаулы әлеуметтік көмек тағайындалды. Су тасқынынан зардап шеккен 78 мүгедек адамның ішінде техникалық көмекші орнын толтырушы құралдарынан айырылғандары бар. Күні бүгін демеушілердің көмегімен 7 адам жөргекпен, біреуі несие қабылдағышпен, біреуі жаялықтармен, үшеуі уақытша кресло-арбалармен қамтамасыз етілді», деді Д.Исқақова.
Брифингте сондай-ақ БҚО қаржы басқармасы басшысының орынбасары Медет Айдынғалиев табиғи сипаттағы ТЖ салдарынан зардап шеккендерге келтірілген зиянды өтеу тәртібін түсіндіріп берді.
«Су тасқыны басылысымен қала мен аудандарда құрылған комиссиялар үй-үйді аралап, нақты жағдайдың қандай екендігін бағамдайды. Баспана жарамсыз деп таныла ма, әлде жөндеуге жата ма, қанша мал-мүлкі суға кетті, соның бәрі қаралады. Әкімдіктер тұрғындардың өтініші тіркелген күннен бастап 10 жұмыс күні ішінде бағалаушыны тарта отырып, келтірілген нұқсанның мөлшерін бағалауды ұйымдастырады. Залал мөлшері анықталғаннан кейін қаражат бөлу туралы шешім қабылданады», – деді М.Айдынғалиев.
Еске сала кетейік, бұдан бұрын Батыс Қазақстан облысында 1 591 мал өлуіне байланысты шығынның қалай өтелетінін жазған болатынбыз. Сондай-ақ Орал қаласында зардап шеккен тұрғындардан өтініш қабылдау басталды.
Батыс Қазақстанда 7 мыңдай адам эвакуацияланды.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.