Бүгін Астанада бокстан өтіп жатқан спаррингтік турнирде жартылай финалдың жекпе-жектері өтеді. Шаршы алаңға 54, 63,5, 66 және 75 келі салмақтағы боксшылар шығады.
Алдымен 63,5 келіге дейінгі салмақтағы былғары қолғап шеберлері күш сынасады. Бірінші жекпе-жекте Мұхаммедсабыр Базарбайұлы мен Жандос Қарабалиев қолғап түйістіреді. Мұхаммедсабыр кеше ширек финалда Ертуған Зейнуллиновты жеңген. Ал Жандос спаррингке екінші айналымнан қосылып отыр.
Серік Теміржанов пен Дулат Бекбауов та бірінші жекпе-жектерін өткізеді.
Қыздар арасында 54 келі салмақта Ұлжан Сәрсенбек пен Жайна Шекербекова рингке шығады. Кеше екеуі де қарсыластарын қиналмай жеңді. Ұлжан Элина Базаровадан 5:0 есебімен басым түсті. Жайна да Балауса Мұздыманнан 5:0 есебімен айласын асырды.
Содан кейін Сымбат Әлиасқар мен Анель Сақыш финалға жолдама үшін бокстасады. Кеше Сымбат ¼ финалда әлем чемпионы, Қазақстанның 9 дүркін чемпионы Дина Жоламанды жолда қалдырды. Ол 31 жастағы тәжірибелі боксшыны жеңіп, сенсация жасады. Әнел Сақыш болса, Сәния Сұлтанқызын төрешілердің шешімімен жеңді.
66 келіде Милана Сафронова мен Наталья Богданова қолғап түйістіреді. Азия ойындарының қола медалисі Наталья Богданова Рио Олимпиадасының жүлдегері, Азия чемпионы Дариға Шәкімовадан басым түсіп, ½ финалға шықты. Милана Сафронова турнирге екінші айналымнан қосылып отыр.
Лаура Есенгелді мен Жасмин Қизатова да алғашқы жекпе-жектерін өткізеді.
75 келіде Гүлсая Ержан мен Жібек Жарасқызы рингке көтеріледі.
Кездесулерді 16:00-де Qazsport арнасы тікелей эфирден көрсетеді.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
