– Қазақстанда кейбір препараттарды медициналық емес мақсатта пайдалану айтарлықтай өсті. Яғни синтетикалық есірткінің әсерін күшейту үшін сатып алынады. Бұл туралы Мәжілістің жалпы отырысында тиісті заң жобасын талқылау кезінде депутат Снежанна Имашева айтты.
«Атап айтқанда, «трамадол», «тропикамид», «азоттың тотығы», «сомнол», «прегабалин» және тағы сол сияқты медицина препараттарын жастар көп пайдаланып жатыр. Бұл заттарды есірткіге тәуелді адамдар синтетикалық есірткінің әсерін күшейту үшін пайдаланады. Нәтижесінде оларға медициналық емес сұраныс айтарлықтай өсті. Мәселен, тропикамид көз тамшыларын нашақорлар мұрынға тамызады немесе көктамырға жібереді. Осыдан галюциногендік әсер алады немесе синтетикалық есірткінің әсерін күшейтеді», – деді С. Имашева.
Оның айтуынша, қазір осы дәрілік заттарды рецептсіз бергені және олармен жұмыс істеу қағидаларын бұзғаны үшін тек әкімшілік жауаптылық қарастырылған.
«Бұл жағдай осы препараттарды медициналық емес мақсатта сататын қаскөйлерге тосқауыл бола алмай тұр. Мысалы, 2022 жылы бүкіл елге танымал, фармацевтикалық білімі жоқ Трамадол Королі (Н. Карпов) күшті әсер ететін заттардың ірі партиясымен бірнеше рет ұсталды. Бірақ, онда дәріхана қызметіне формальды түрде лицензиясы болғандықтан, күшті әсер ететін медициналық препараттарды заңсыз таратқаны үшін әкімшілік айыппұл төлеп құтылып кетті. Сондықтан, жобада аталған медициналық препараттар құрамы бар күшті әсер ететін заттардың заңсыз айналымы, олармен жұмыс істеу қағидаларын бұзғаны, сондай-ақ оларды ұрлағаны үшін қылмыстық жауаптылықты енгізу ұсынылып отыр», – деді депутат.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.