– Алматыда өткен «New Vision: Бизнес күші» жаһандық бизнес-форумында танымал қазақстандық әнші Димаш Құдайберген шығармашылық жоспарымен бөлісіп, әйгілі хиттерін орындады.
«Алдағы жылдары үлкен жобаларды қолға аламын. Мен қазір мүмкіндіктерімді тиімді пайдаланғым келеді. Халықаралық аренаға қазақтын ұл-қыздарын шығарсам деймін. Барынша қолдап, жол сілтеп, мықты менеджерлермен таныстырып, үлкен агенттерге көрсетіп, жол салып бергім келеді. Менің де дәуренім өтпелі. Бұл күн бүгін бар, ертең жоқ. Сондықтан қазаққа қазақтың мүддесі үшін пайдамды тигізе алсам одан басқа менің арманым жоқ. Мен 5 жасымнан бастап музыкадан дәріс алып келе жатырмын. Биыл докторлық дәрежемді қорғаймын. Жинаған тәжірбиемді үлкен әнші болуды армандап жүрген жас жеткеншектермен бөліскім келеді»,- дейді Димаш Құдайберген.
Ол сондай-ақ түрлі қалалар мен елдерден ұшып келген жанкүйерлеріне алғыс айтты. Республика сарайының сахнасында жүргізушінің сұрақтарына жауап бере отырып, Отанға деген сүйіспеншілігін білдірді. Әнші «Отаның қандай?» деген сұраққа жауап берді.
«Рұқсат етсеңіз, мен бұл сұраққа философиялық тұрғыдан жауап берейін. Ағылшын-америкалық жазушы Томас Пейн былай деген екен: «Жер – менің Отаным, барлық адамдар – менің бауырым» деген. Бұл жерде мен өз Отанымды, елімді, халқымды сүйетінімді айтқым келеді, бірақ мен адамзатты дінге, елге, ұлтқа бөлгім келмейді. Біз, қазақ – дана халықпыз, әр адам өзі үшін жауапты. Достарына, айналасына мейірімді болуы керек, сонда бұл адам өзінің даналығын көрсетеді. Менің ойымша, әрбір мемлекет осы философияны ұстануы қажет. Ата-бабаларымыз осы Жер үшін күресіп, оны ұрпақтарына аманат етіп қалдырды. Ал біз оны кейінгі ұрпаққа жеткізуіміз керек. Біз ұлы болашаққа дайын екенімізді, ұлы бабалардың ұрпағы екенімізді көрсетуіміз керек. Бүкіл әлемде бейбітшілік болсын»,- деді ол
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.