Бата беру – қазақтың көнеден келе жатқан ең асыл дәстүрі

Елордада ақсақалдар арасында бата беруден «Ақ бата» байқауы ұйымдастырылды, деп хабарлайды Астана әкімдігінің ресми сайты.

Бата беру – қазақтың көнеден келе жатқан ең асыл дәстүрі. Ал бүгінгі күні батагөй ақсақалдардың азаюы, дуалы сөздің ұмытылып бара жатқаны өзекті мәселе. Ұлттық мұрамызды ұлықтау мақсатында Астана қаласында Тілдерді дамыту және архив ісі басқармасының ұйымдастыруымен Наурызнаманың он күндігі аясында «Ақ бата» байқауы өтті.

Байқаудың алғысөзін Тілдерді дамыту және архив ісі басқармасының басшысы Сәкен Есіркеп ашты. Елордалық 7 ақсақал ұлттық дәстүрді заманауи бағытта жаңғыртып, сынға түсті. Сайыстың бірінші кезеңінде қариялар батаның 7 түрі бойынша (наурыз бата, алғыс бата, отау бата, балаға бата, жолаушыға бата, ас бата, той бата) өнер көрсетті. Екінші кезеңде қатысушылар салт-дәстүрге қатысты сұрақтарға жауап берді.

Екі кезеңнің қорытындысы бойынша, қазылар алқасының шешімімен үш ақсақал жүлделі орынға ие болды. Бірінші орынды 77 жастағы Мекебай Кәкенұлы, екінші орынды Айдарбек Қаржауұлы, үшінші орынды 77 жастағы Ратқан Әліпбаев жеңіп алды. Сайысқа белсенді қатысқан қариялар Тастыбай Сәкенұлы, Ермек Хамзаұлы, Маманбай Рақметұлы, Қанат Сәлменұлы алғыс хаттармен марапатталды.
Сондай-ақ, көрерменмен «әкем үйреткен бата» айдары бойынша интерактив ұйымдастырылды. Елорда тұрғындары да бата берудің маңызы, ұлттық ғұрпымыздың құндылығы жайында ой-пікірлерін білдіріп, жарыса бата берді. Кеш мерекелік концертпен сүйемелденіп, елімізге белгілі әншілер өнер көрсетті.