ҚР Парламенті Сенатында Әлеуметтік-мәдени даму және ғылым комитетінің депутаттары Туризм және спорт министрлігінің басшылығымен, сондай-ақ салалық ұйымдардың өкілдерімен жұмыс бабындағы кездесу өткізді. Ойын бизнесі мен лотерея қызметі саласындағы заңнамалық өзгерістерді қолдану тәжірибесі талқылаудың басты тақырыбы болды.
Отырыс барысында индустрияны құқықтық реттеудің негізгі мәселелері, нарыққа жаңа ережелердің әсері, сондай-ақ азаматтардың құқықтарын қорғау шаралары қозғалды. Сенаторлар ойын бизнесі ел экономикасына айтарлықтай ықпал ететінін, алайда оны әлеуметтік жауапкершілік пен халықты ықтимал жағымсыз салдардан қорғау жөнінде реттеу маңызды екенін атап өтті.
«Заңнама бизнеске ашық жағдайды қамтамасыз етумен қатар азаматтарды да қорғауы тиіс. Ойын бизнесі тек экономикалық пайда әкеліп қана қоймай, сонымен қатар, әсіресе, жастар мен халықтың әлеуметтік осал топтарына әлеуметтік қауіп төндіру ықтималдығын түсінуіміз керек. Сондықтан біздің міндетіміз – теріс пайдалану мүмкіндігінің алдын алатын, құмар ойындарға тәуелділіктің салдарын барынша азайтатын және тиімді мемлекеттік бақылауды қамтамасыз ететін реттеу жүйесін құру. Реттеу тетіктерінің қағаз жүзінде ғана емес, адамдарды да қорғауы маңызды», – деп атап өтті комитет төрағасы Нұртөре Жүсіп.
Кездесу барысында күшейтілген мемлекеттік бақылаудың тиімділігі, құқық бұзушылықтардың алдын алу тетіктері және заңнаманы жетілдіру жөніндегі одан арғы қадамдар талқыланды. Лотерея қызметі және оның ашықтығын арттыру мәселелеріне ерекше назар аударылды.
Суретті түсірген: А.Байжұманов
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
