Алматы әкімдігі Райымбек–Саин көшелерінің қиылысындағы жолайрықтың жағдайына қатысты түсініктеме берді
Райымбек-Саин жолайырығы 2026 жылы күрделі жөндеуден өткенге дейін ай сайын тексеріледі
Алматының қалалық мобильділік басқармасы бұл жолайырықтың жағдайына қатысты БАҚ мен әлеуметтік желілерде айтылған пікірлерге байланысты түсініктеме берді.
Басқарма басшысы Сағындық Телібаевтың айтуынша, бұл жолайрық 2005 жылы салынған және пайдалануға берілген сәттен бастап оның тірек құрылымдарының жағдайы тұрақты түрде бақылауға алынып келеді. 2016, 2020 және 2023 жылдары жүргізілген тексерістерде ақаулар анықталмаған.
«2024 жылдың қараша айында жүргізілген тексеріс нәтижесінде көпір құрылымдарының бетон бетінде ақаулардың пайда болуына, жол жамылғысындағы деформациялық жіктер мен асфальт-бетон жабындысының жөндеуді қажет етуіне байланысты күрделі жөндеу жүргізу туралы шешім қабылданды. Биыл ақпан айында күрделі жөндеуге арналған жобалық-сметалық құжаттаманы әзірлеу бойынша мердігер ұйыммен келісімшарт жасалды. Жөндеу жұмыстары 2026 жылы басталады», – деді басқарма басшысы.
Оның айтуынша, биыл наурыз айында техникалық қызмет жолайрыққа аспаптық тексеру жүргізіп, арнайы датчиктер орнатты. Бұл тексеріс те нормативтен тыс деформация анықтамады.
Сонымен қатар, жолайрықтың қазіргі жағдайын сақтау үшін оның кейбір элементтерін уақытша қорғау (консервация) жұмыстары жүргізіледі. Атап айтқанда: эстакаданың аралық тірегіндегі ригельдің консолді бөлігін арнайы құраммен сылап жөндеу, тіректі қосымша арматуралау және бетін бетондау арқылы жөндеу, оңтүстік бағыттағы бұрылыстағы аралық тіректің консолді бөлігін арнайы құраммен жөндеу жоспарланған.
«Алаңдауға негіз жоқ, бүгінгі күні нысанның бүтіндігіне еш қауіп төніп тұрған жоқ. Күрделі жөндеу басталғанға дейін техникалық қызмет ай сайын жолайырықты тексеріп отырады», – деп сөзін түйіндеді Сағындық Телібаев.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
