Бұл чемпионат – елдегі көркем гимнастиканың басты іріктеу додасы

Елордадағы IZUMRUD гимнастика мектебінде көркем гимнастикадан ел біріншілігі басталды, деп хабарлайды Астана әкімдігінің ресми сайты. 

24-26 мамыр күндері аралығындағы бәсекеде 2009 және одан кейінгі жылдары дүниеге келген спортшылар арасында топтық және жекелей сайыстар бойынша үздіктер анықталады.

Қазақстан чемпионатында Астана, Алматы, Шымкент қалалары және Абай, Павлодар, Алматы, Қызылорда, Қарағанды, Ақмола, Маңғыстау, Атырау, Шығыс Қазақстан, Жамбыл, Қостанай, Солтүстік Қазақстан облыстарынан 150-ден астам гимнасшы жүлдеге таласып жатыр.

«Астанада өтіп жатқан бұл чемпионат – елдегі көркем гимнастиканың басты іріктеу додасы. Жарыс нәтижесі бойынша, ұлттық құрама жасақталып, халықаралық ареналарға баратын үміткерлер анықталады. Көркем гимнастикадан ел спортының тарихы тереңде жатыр. 2004 жылдан бері Қазақстанның көркем гимнасшылары тұрақты түрде жазғы Олимпиада ойындарына қатысып келе жатқандықтан, ел ішінде бәсекелестік өте жоғары. Мысалы, жақында ғана Сингапурда өткен Азия чемпионатында ел спортшылары топтық сайыста көпсайыста алғаш рет чемпион атанды. Бәсекелестіктің өсуі спортшыларды жаңа биіктерге ұмтылуға итермелейді. Ең басты стратегиялық мақсат – 2028 жылы Лос-Анджелесте өтетін Олимпиадаға жолдама алып, абыроймен өнер көрсету», – деді көркем гимнастикадан мемлекеттік жаттықтырушы Жанар Омарова.

Бүгінгі жарыс күнінде қатысушылар шығыршық және доп жаттығулары бойынша іріктеу кезеңінде сынға түседі.