Қазақстан Республикасының Туризм және спорт министрі Ербол Мырзабосынов садақ атудан Сингапурде өткен Азия кубогінің екінші кезеңінде жоғары нәтиже көрсеткен спортшылармен және бас бапкермен кездесті.
Министр спортшылардың сары құрлық бәсекесінде ел намысын абыроймен қорғап, халықаралық аренада лайықты өнер көрсеткенін атап өтіп, бұл – отандық садақ ату спортындағы тарихи жетістік екенін айтты.
«Сіздердің жарқын жетістіктеріңіздің және мемлекеттің жан-жақты қолдауының нәтижесінде елімізде садақ ату спортына деген қызығушылық артып келеді. Қазіргі таңда елімізде бұл спорт түрімен 7 000-ға жуық адам айналысады. Азия кубогіндегі нәтиже – Қазақстан спортындағы тарихи жетістік. Садақшыларымыз бұрын-соңды мұндай жетістікке қол жеткізген емес. Бұл – спортшылар мен жаттықтырушылардың бірлескен еңбегінің жемісі. Азия кубогіндегі зор табыс садақ ату спортының танымалдылығын одан әрі арттыра түседі деп ойлаймын», – деді Ербол Мырзабосынов.
Туризм және спорт министрі құрлықтық жарыста үздік нәтиже көрсеткен Адель Жексенбинова, Виктория Лян, Ділмұхамет Мұса, Бунед Мирзаметов, Андрей Тютюн және Роксана Юнусованы Құрмет грамотасымен марапаттады. Ал ұлттық құраманың бас жаттықтырушысы Бауыржан Жолдыбаевқа Алғыс хат табыстады.
Айта кетейік, 15–20 маусым күндері Сингапурде өткен Азия кубогінің екінші кезеңінде Қазақстан құрамасы ерлер арасындағы командалық және аралас командалық сында алтын жүлде иеленді. Ал әйелдер арасындағы командалық жарыста жерлестеріміз қола жүлдеге қол жеткізді.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
