Ауыл шаруашылығы министрлігінде Қазақстан Республикасының Ауыл шаруашылығы министрлігі Ветеринариялық бақылау және қадағалау комитетінің өкілдері мен Иордания Хашимит Корольдігінің ветеринариялық қызметі делегациясының кездесуі өтті.
Кездесудің негізгі тақырыбы – қазақстандық сиыр еті, қой еті және тірі малды Иордания нарығына экспорттау мәселелері болды.
Қазақстандық тарап еліміздің ветеринариялық бақылау жүйесі, қадағалау және сертификаттау рәсімдері, сондай-ақ отандық өнімнің жоғары сапасы мен қауіпсіздігін қамтамасыз ететін биологиялық қауіпсіздік шаралары туралы ақпарат ұсынды.
Келіссөздер барысында және тараптардың ветеринариялық қызметтері арасында бұған дейін жүргізілген өзара әрекеттестіктің нәтижесінде сиыр еті мен қой еті бойынша мал шаруашылығы өнімдерін экспорттауға құқығы бар 6 қазақстандық кәсіпорынның Иорданияның ресми тізіліміне енгізілуіне келісім алынды.
Анықтама үшін:
•Батыс Қазақстан облысы – «Батыс-НЫК» ЖШС, «Батыс Марка Ламб» ЖШС
•Түркістан облысы – «Қайып ата» ЖШС, «Түркістан ет комбинаты» ЖШС
•Алматы қаласы – «Almaty Royal Food» ЖШС
•Абай облысы – «Abaya meat processing factory» ЖШС
Иорданиялық әріптестермен келіссөздер ветеринариялық сертификаттарды келісу тәртібін талқылауға, сондай-ақ агроөнеркәсіп саласындағы сауда-экономикалық ынтымақтастықты кеңейту бойынша алдағы қадамдарды айқындауға мүмкіндік берді.
Айта кетейік, Қазақстан жыл сайын ет өнімдерін өндіру мен экспорт көлемін арттырып келеді. 2024 жылы Қазақстаннан 30 мың тоннадан астам сиыр және қой еті экспортталды, оның ішінде Таяу Шығыс елдеріне де жөнелтілді. Отандық өнім Дүниежүзілік жануарлар денсаулығы ұйымы (WOAH) тарапынан расталған халықаралық сапа және қауіпсіздік стандарттарына толық сәйкес келеді.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
