Төтенше жағдайлар министрлігінің 30 жылдығына орай біз күн сайын халықты апаттар мен төтенше жағдайлардан қорғап жүрген жандар туралы айтамыз.
Осы материалдың кейіпкері Батыс Қазақстан облысы ТЖД Орал қаласы ТЖ басқармасы №1 мамандандырылған өрт сөндіру бөлімінің бөлімше командирі, азаматтық қорғау сержанты Артур Бердашев. Ол министрліктің құрдасы, 1995 жылдың 14 тамызында туған.
Азаматтық қорғау органдарындағы қызметін 2016 жылы бастады, ал қазіргі атқарып жүрген лауазымына 2025 жылдан бастап тағайындалды. Қызмет еткен жылдары өзін жауапкершілігі жоғары, білікті әрі батыл құтқарушы ретінде көрсетті.
Оның кәсібилігі мен батылдығының жарқын мысалдарының бірі 2023 жылдың 17 қазанында Оралдағы бес қабатты үйдің пәтерінде өрт туралы хабарлама түскен кезде болды. Пәтер ішінде өздігінен шыға алмай қалған кішкентай балалар болған. Бердашев бір сәт те кідірместен жалын шарпыған пәтерге кіріп, балаларды тауып, оларды қауіпсіз жерге алып шықты. Құтқару операциясының нәтижесінде жалпы саны 15 адам, соның ішінде 5 бала эвакуацияланды. Бөлімшенің жедел әрі үйлесімді әрекетінің арқасында өрт көрші пәтерлерге таралмай, дер кезінде сөндірілді.
Қызметтік борышын орындау кезінде көрсеткен ерлігі үшін 2024 жылы Артур Бердашев Қазақстан Республикасы Президентінің Жарлығымен «Ерлігі үшін» медалімен марапатталды.
Артурдың оқиғасы құтқарушының өмірбаяны ғана емес, ол рухтың, шешімнің және адамгершіліктің үлгісі. Ол әр күнін борышы мен жауапкершілігін орындауға және өзге адамдардың өмірін қорғауға арнаған ТЖМ мыңдаған қызметкерлерінің бірі.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
