Алмалы ауданда тұрғындарға арналған тағы бір жайлы демалыс аймағын абаттандыру жұмысы басталды. Жаңарту жұмысы Розыбакиев көшесінің бойында Төле би көшесінің қиылысында жүргізіледі.
Осы аптада аудан әкімі тұрғындармен кездесіп, алдағы жұмыстарды талқылады. Өткен жылы «Халық қатысатын бюджет» жобасы аясында тұрғындармен бірге бұрынғы бейберекет сауда орнының орнында жаңа сквер салынған болатын. Ол Розыбакиев көшесінің бойында (Розыбакиев пен Дүйсенов көшелерінің қиылысында) орналасқан және қысқа уақыт ішінде аудан тұрғындарының сүйікті демалыс орнына айналды.
Одан сәл жоғары, Төле би көшесіне жақын маңда тағы бір сквер бар — ол 2016 жылдан бері жаңартылмаған. Тұрғындардың көптеген өтінішінен кейін биыл бұл аймақты да жаңарту ағымдағы жөндеу аясында қолға алынды.
🔹 Жоспарланған жұмыстар:
– көрші сквермен бірыңғай үлгіде жаңа жарықтандыру орнату (кабель ауыстыру, жаңа тіректер қою);
– көгалдандыру: көгал, бұталар мен ірі көлемді ағаштар отырғызу, автоматты суару және тамшылатып суару жүйесін орнату;
– демалыс және спорт аймағын абаттандыру: жаттығу құрылғылары, әткеншектер, перголалар, орындықтар мен қоқыс жәшіктері орнатылады.
Жаңарту нәтижесінде екі көрші аймақ — былтырғы жаңа сквер мен қазір абаттандырылып жатқан аумақ — біртұтас жасыл демалыс аймағына айналады. Қараша айының соңына дейін тұрғындар Төле би көшесінен бастап Дүйсенов көшесіне дейін созылған Розыбакиев көшесінің батыс жағындағы кең, абаттандырылған демалыс аймағында серуендеп, спортпен шұғылданып, бос уақытын тиімді өткізе алады.
Алмалы ауданның қалалық ортасын кезең-кезеңімен дамытып, оны тұрғындар үшін барынша жасыл әрі жайлы етуге күш саламыз.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
