Парламент Сенатының Әлеуметтік-мәдени даму және ғылым комитетінің төрағасы Нұртөре Жүсіп Қызылорда облысына жасаған жұмыс сапары барысында «Ақмешіт» музейінің және өңірлік архивтің басшылығымен және қызметкерлерімен кездесу өткізді.
Талқылау Мемлекет басшысының жуырдағы сұхбатында айтылған, білім, оқу мәдениетінің және тарихи мұраға саналы көзқарастың маңызына ерекше назар аударылған тәсілдер аясында өтті. Президент оқу мәдениеті жоғары елдер ғана жаһандық прогрестің алдыңғы қатарында қалатынын атап көрсетті.
Осыған байланысты музейлер мен архивтердің қызметі тарихи жадыны сақтауға және білімнің сенімді бастауларына қолжетімділікті қамтамасыз етуге бағытталған мемлекеттік мәдени саясаттың маңызды элементі ретінде қарастырылады.
Кездесу барысында Нұртөре Жүсіп «Ақмешіт» музейі мен өңірлік архивтің қорларды сақтау және жүйелеу функцияларын ғана емес, сонымен бірге білім беру және ағарту жұмыстарында, ғылыми зерттеулерді қолдауда және жастар арасында тарих пен мәдениетке деген қызығушылықты қалыптастыруда негізгі рөл атқаратынын атап өтті.
«Мәдениет және архив ісі саласындағы мемлекеттік саясат елдің тұрақты дамуының құрамдас бөлігі ретінде қарастырылады. Осыған байланысты музей және архив инфрақұрылымын жаңғырту, азаматтардың мәдени және тарихи құндылықтарға қолжетімділігін кеңейту, сондай-ақ қорларды цифрландыру және есепке алу мен сақтаудың заманауи технологияларын енгізу бойынша шаралар іске асырылуда», – деп атап өтті Нұртөре Жүсіп.
Сенатор өңірлік мәдениет мекемелері мен архивтерді дамытуға, олардың материалдық-техникалық базасын нығайтуға және сала қызметкерлерінің тиімді кәсіби қызметі үшін жағдай жасауға ерекше көңіл бөлінетінін баса айтты.
Жекелей тоқталғанда, Парламент Сенаты музей және архив ісі саласындағы құқықтық базаны жетілдіруге бағытталған бірқатар заңнамалық өзгерістер қабылдағаны айтылды.
«Қабылданған заңнамалық өзгерістер тарихи-мәдени мұра нысандарын қорғауды күшейтуге, Ұлттық архив қорын дамытуға, цифрлық архивтерді және құжаттарды сақтаудың заманауи стандарттарын енгізуге ықпал етеді. Бұл нормаларды дайындау кезінде кәсіби қоғамдастықтың ұсыныстары ескерілді және бұл тәжірибе жалғасын табатын болады», – деді Нұртөре Жүсіп.
Сондай-ақ, сенатор саланың кадрмен қамтамасыз етілуі және музейлер мен архивтер қызметкерлерінің еңбек жағдайлары мәселелеріне назар аударды.
«Мемлекет мәдениет қызметкерлерінің жалақысын кезең-кезеңімен арттыру, мекемелердің материалдық-техникалық базасын жаңарту, біліктілікті арттыруға және кәсіби өсуге мүмкіндіктер жасау бойынша шаралар қабылдауда. Бұл шаралар кадрлық әлеуетті нығайтуға және салаға жас мамандарды тартуға бағытталған», – деді ол.
Кездесу қорытындысы бойынша Нұртөре Жүсіп музей және архив ісін дамыту мәселелері, оның ішінде кадрлық және инфрақұрылымдық аспектілер Сенаттың және бейінді мемлекеттік органдардың тұрақты бақылауында екенін атап өтті. Диалог барысында айтылған ұсыныстар мен ескертулер одан әрі заңнамалық және талдау жұмыстарында пайдаланылатын болады.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
