Конституциялық реформа – елдің ұзақ мерзімді дамуының негізі

Бүгін елордада студенттік өзін-өзі басқару көшбасшылары мен белсенді жастардың қатысуымен «Конституциялық реформа – елдің ұзақ мерзімді дамуының негізі» тақырыбында диалог алаңы өтті. Жиынның басты нәтижесі ретінде қатысушы жастар еліміздің Негізгі Заңына енгізілетін өзгерістерді толықтай қолдап, арнайы мәлімдеме жасады. «Ауыл» партиясының Орталық аппаратында өткен басқосуда Мемлекет басшысы Қасым-Жомарт Тоқаев жариялаған саяси жаңғырулардың қорытынды кезеңі – жаңа Конституция жобасы кеңінен талқыланды.                                                                                              Жиынды ашқан «Ауыл» партиясы Орталық аппарат басшысының орынбасары Нұрхат Ораш жаңа құжаттың идеологиялық маңызына тоқталды. Оның айтуынша, Конституция жобасы «Заң мен тәртіп», «Адал азамат» және «Таза Қазақстан» тұжырымдамаларын заңдық деңгейде бекітеді.  «Бұл құжат – жай ғана құқықтық ережелер жинағы емес, бұл – «Әділетті Қазақстанның» жаңа философиясы. Жаңа Конституцияда вице-президент институтын енгізу және Құрылтайдың жаңа архитектурасын қалыптастыру – билік сабақтастығы мен ұлттық басқару дәстүрінің заманауи үйлесімі», – деп атап өтті Н. Ораш.  Диалог алаңында тек талқылау ғана емес, жастардың саяси ұстанымы нақтыланды. Еуразия ұлттық университеті, Қорқыт Ата атындағы Қызылорда университеті және Қазақ ұлттық спорт университетінің студенттік көшбасшылары реформаларға қатысты өз көзқарастарын білдірді.   Жиынға қатысушы студенттік ұйымдардың лидерлері мен белсенді жастар Конституцияның жаңа жобасын толықтай қолдайтындықтарын білдірді. Көшбасшылар бұл реформаны елдің демократиялық бағытын айқындайтын және азаматтық қоғамды нығайтатын тарихи қадам ретінде бағалады. Студенттер атап өткендей, жаңа Конституция адам капиталына, білім мен инновацияға басымдық бере отырып, жас буын үшін жаңа әлеуметтік лифтілер мен құқықтық кепілдіктер ашады.                                          Сарапшылар мен саясаттанушылар Д. Прімбетов, Е. Елемес реформа аясындағы бір палаталы Парламент пен партиялық жүйенің жандануы саяси мәдениетті жаңа деңгейге көтеретінін алға тартты. Сондай-ақ, Негізгі Заңға өзгерістер енгізудің тек бүкілхалықтық референдум арқылы жүзеге асуы – мемлекеттік тұрақтылықтың басты кепілі екені айтылды.  Жиын соңында қатысушылар жаңа Конституция – өткенді саралап, болашаққа нық қадам жасауға мүмкіндік беретін стратегиялық таңдау деген ортақ байламға келді.