Алматылық гимнаст Милад Карими Осиек қаласында (Хорватия) өткен спорттық гимнастикадан Әлем кубогы кезеңінде сәтті өнер көрсетті. Бұл туралы Алматы қаласының Спорт басқармасының өкілдері хабарлады.
Спортшы керме жаттығуында күміс медаль иеленді. Финалда Милад Карими 14,933 ұпай жинап, жоғары дайындық деңгейі мен ерекше өнер көрсетті.
Жарыс жеңімпазы Тайбэй өкілі Тан Цзяхун болды, ол 15,233 ұпай жинады. Ал үшінші орынды колумбиялық Анхель Барахас иеленді (14,833 ұпай).
Сондай-ақ Әлем кубогы кезеңінде басқа да алматылық спортшылар көзге түсті: Зейнолла Ыдырысов ат снарядындағы жаттығуда күміс жүлдегер атанса, Нариман Құрбанов қола медаль жеңіп алды.