Экологиялық жауапкершілік – жай ғана тренд емес, қазіргі әлемнің қажеттілігі

24 ақпанда Семей қаласындағы «Алатау» сауда орталығында «Экологиялық мәдениет: экосөмке таңда!» экологиялық акциясы өтті. Бұл шара «Таза Қазақстан» жалпыұлттық жобасы аясында ұйымдастырылды. Іс-шараны ұйымдастырушы – «Абай жастары» жастар ресурстық орталығы. Акцияның басты мақсаты – халық арасында экологиялық мәдениетті қалыптастыру және қоршаған ортаның ластану мәселесіне назар аударту.

Шара барысында қала тұрғындары мен қонақтарына бір реттік полиэтилен пакеттеріне экологиялық таза балама ретінде көп мәрте қолдануға болатын шоппер сөмкелері таратылды. Шопперлерді тарату барысында саналы тұтынудың маңыздылығы мен пластикалық ластануды азайту жайлы ақпараттық-түсіндіру жұмыстары жүргізілді.

— Бүгінгі таңда жастар мен жалпы халық арасында экологиялық мәдениетті қалыптастыру бұрынғыдан да маңызды. Бір реттік пластик – ең күрделі экологиялық мәселелердің бірі, және біз оны тұтынуды саналы таңдау арқылы азайта аламыз. Шопперлер – бұл ыңғайлы, сәнді әрі табиғатқа қауіпсіз балама. Біз мұндай акциялар адамдарды қоршаған ортаны қорғауға өз үлесін қосуға жетелейді деп үміттенеміз, – деді жастар өкілі Мұратова Ботагөз.

Бұл акция «Таза Қазақстан» бағдарламасының бір бөлігі ретінде ұйымдастырылып, қоғамда тұрақты экологиялық тәжірибелерді ілгерілетуге бағытталған. Алдағы уақытта мұндай іс-шаралардың ауқымын кеңейтіп, көбірек адамды экологиялық қозғалыстарға тарту және табиғатты қорғауға бағытталған тұрақты әдеттерді дамыту жоспарлануда.

Экологиялық жауапкершілік – жай ғана тренд емес, қазіргі әлемнің қажеттілігі. Саналы тұтынудың және қалдықтарды азайтудың маңыздылығын қаншалықты көп адам түсінсе, болашақ ұрпақ үшін қоршаған орта соншалықты таза болады. Акцияны ұйымдастырушылар мұндай бастамалар игі дәстүрге айналып, қоғамның экологиялық мәдениетіне оң әсерін тигізетініне сенімді.