Сенаттың Әлеуметтік-мәдени даму және ғылым комитетінің депутаттары Нұртөре Жүсіп пен Алтынбек Нухұлы әл-Фараби атындағы Қазақ ұлттық университетінде болды. Нұртөре Жүсіп жоғары оқу орнының басшылығымен әңгіме барысында әл-Фараби атындағы Қазақ ұлттық университеті қазіргі заманғы отандық жоғары білім мен ғылым жүйесін қалыптастыруда шешуші рөл атқаратын Орталық Азиядағы ең көне және жетекші жоғары оқу орындарының бірі екенін атап өтті.
«Бүгінде жаһандық сын-қатерлер мен қарқынды өзгеріп жатқан әлем жағдайында әл-Фараби атындағы Қазақ ұлттық университетінің маңызы арта түсуде. Бұл жай ғана білім беру мекемесі емес, білім үдетудегі ұлттың стратегиялық ресурсы, жаңа буын көшбасшыларын тәрбиелеу және халықаралық аренада Қазақстанның келбетін ілгерілету орталығы болып табылады. Университетті қолдау және дамыту, оның дербестігін нығайту, халықаралық әріптестікті кеңейту және еліміздің түкпір-түкпірінен және шетелден талантты жастардың ағынын қамтамасыз ету мемлекеттің аса маңызды міндеті болып табылады. ҚазҰУ – бұл жай ғана университет емес, елдің мақтанышы, біздің ортақ зияткерлік капиталымыз және Қазақстанның болашағына салынған инвестиция», – деді Нұртөре Жүсіп.
Депутат Алтынбек Нұхұлы өз кезегінде ҚазҰУ үш деңгейлі білім беру жүйесін енгізудегі бастамашының бірі екенін атап өтті. Университет елімізде бірінші болып несиелік оқыту жүйесіне көшті, білім беру үдерісіне электрондық оқыту мен жасанды интеллект элементтерін белсенді енгізуде.
«ҚазҰУ тек оқытып қана қоймай, ұлт элитасын қалыптастырады. ҚР Парламенті депутаттарының 25%-дан астамы, ондаған әкімдер, министрлер, ғалымдар, дипломаттар мен қоғам қайраткерлері, әл – Фараби атындағы университеттің түлектері», – деп атап өтті Алтынбек Нұхұлы.