Атырау қаласындағы Назарбаев зияткерлік мектебінің 12-сынып оқушысы Инабат Шабахова табиғатқа зиянсыз биопластик ойлап тапты. Жаңа өнім толықтай табиғи қоспалардан дайындалады және қоршаған ортаға қауіп төндірмейді, – деп хабарлайды Өңірлік коммуникациялар қызметі.
Жас өнертапқыштың айтуынша, биопластик суға төзімді және топырақта бір айдың ішінде 80 пайызға дейін ыдырайды. Жобаны сынау мақсатында бірнеше тәжірибелік үлгі әзірленген.
– Бұл биопластиктің қарапайым пластиктен айырмашылығы көп. Алдағы уақытта оны әрі қарай дамытып, пакет жасауға ниеттімін. Әсіресе, тамақ жеткізу қызметі мен дүкендерге арналған қаптама ретінде қолдануға болады, – дейді Инабат Шабахова.
Сала мамандарының мәліметінше, қолданыстағы пластик өртенген кезде улы заттар бөледі және табиғатта жүздеген жыл бойы жойылмайды. Сонымен қатар ғалымдар пластиктің адам денсаулығына кері әсер етіп, түрлі аурулардың туындауына себеп болатынын дәлелдеп отыр.
– Мектепте жыл сайын ғылыми жәрмеңкелер ұйымдастырылады. Оқушылар жетекші ұстазымен бірге өз жобаларын жүзеге асырады. Инабатпен былтырдан бері жұмыс істеп келеміз. Алдағы уақытта жобаны жарыстарда қорғап, дамытуды жоспарлап отырмыз, – деді биология пәнінің мұғалімі Лазифа Қайратхан.
Айта кетейік, жас зерттеуші былтыр «Дарын» орталығы ұйымдастырған облыстық желілік турдан өтіп, республикалық кезеңге жолдама алды.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
