Саяси дода қарсаңында қоғамдық алаңға мониторинг жүргізген «Адал сайлау үшін» штабы жақында осы сараптаманың нәтижесін жариялады. Сондай-ақ штаб мүшелері алдағы Мәжіліс пен мәслихат депутаттарының сайлау науқаны алдындағы ахуал туралы ой-пікірлерімен бөлісті.
БАҚ өкілдеріне арналған баспасөз брифингінде штаб басшысы Серік Ақылбай кезектен тыс сайлауға дайындық және оны өткізу жөніндегі негізгі іс-шаралардың күнтізбелік жоспарына жан-жақты тоқталды.
– 18 ақпан күні сағат 18:00-де кандидаттар мен партиялық тізімдерді тіркеу аяқталады. Депутаттыққа кандидат ең алдымен сайлау құқығына ие болуы керек. Сот әрекетке қабілетсіз деп таныған, сондай-ақ сот үкімі бойынша бас бостандығынан айыру орындарындағы азаматтардың сайлануға құқығы жоқ. Парламент Мәжілісінің депутаттығына кандидат соңғы 10 жылда елімізде тұрақты тұратын, 25 жасқа толған Қазақстан азаматы бола алады, – деп штаб басшысы кандидатқа қойылатын талаптарды түсіндіріп өтті.
С.Ақылбай жүргізілген мониторинг нәтижелері бойынша округтік сайлау комиссиясына кандидаттың Қазақстан аумағында соңғы 10 жыл бойы тұрақты тұру сәйкестігін анықтау қиынға соққанын мәлімдеді. Оның айтуынша, мұндай деректер көші-қон қызметінің тарапынан расталмаған. Ал заңнама бойынша сайлау комиссиялары өкілетті органдардан алынған мәліметтерді қайта тексеруге құқылы емес.
«Құқықтық негізде тұрақты тұрудың заңды фактісін растау және анықтау тек сот тәртібімен анықталады. Осыған орай сот шешімінің негізінде округтік сайлау комиссиясы шешімін қайта қарап, кандидаттың Парламент Мәжілісінің депутаттығына кандидаттарға қойылатын талаптарға сәйкестігін анықтады», деп атап өтті С.Ақылбай.
Сондай-ақ штаб мүшесі Әбдікәрім Ақжанов партиялық тізімдер бойынша да, бір мандатты округтер бойынша да депутаттыққа кандидаттар заң ережелерін басшылыққа алуға міндетті екенін, өйткені депутаттар заң шығару және мемлекеттік шешімдер қабылдау саласында жауапкершілік жүктемесін көтеретінін алға тартты. Заңгер Думан Жанпейісов сайлау заңнамасының ықтимал бұзушылықтардың түрлерін, оның ішінде үгіт-насихат кезеңінің басталуына дейін үгіт материалдарын орналастыру, сайлау күні және оның алдында үгіт материалдарын орналастыру туралы айтты.
Іс-шара соңында «Адал сайлау үшін» штабының басшысы Серік Ақылбай депутаттыққа кандидаттар мен партияларды сайлау науқанын заң шеңберінде жүргізуге шақырды.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
