Әкім қонған ақбоз үй енді балаларды оңалту орталығына айналады

Алакөлдегі резиденция бұған дейін облыс әкімі мен түрлі қонақтарды қа­былдайтын қонақүй болса, енді ба­ла­­лардың демалыс немесе сауық­ты­ру ор­та­лығына айналады. Жалпы, атал­­ған нысан Ақши ауылында орна­лас­­қан. Ал балалар орталығы былтыр Үшарал қаласында ашылған еді. Қуа­ныш­ты жаңа­­­лықты өңір басшысы ала­көл­дік­тер­мен кездескенде айтты.

«Бүгін «Жансая» балаларды оңалту орталығының жұмысымен таныстық. Ашылғанына 6 ай болған, қазір оған 20-дан астам бала барып жүр. Мұнда балаларға медициналық көмек тегін көрсетіледі, түрлі коррекциялық-оңалту сабақтары өткізіледі, ба­лалар сурет салады, демалады, емдік дене­шы­нықтырумен айналысады. Ата-ана­лар балаларын еш алаңсыз күні бойы қалдырып, жұмыстарына бара бере алады. Егер балалар шалғай ауылдардан келсе, онда жатын орынмен де қамтылады. Та­мағы да, басқа да қажеттіліктері ұйым­­дастырылған. Бұдан әрі де тигізер пай­­­дасы еселене түссін деген мақсатта «Жан­сая» орталығына аудан әкімдігінің резиденциясын беруді ұсынып отырмын. Ақши ауылындағы шағын коттедж үйде жазғы уақытта балалар Алакөл суына шомылып, денсаулықтарын түзей алады», деді Б.Исабаев.

Одан кейін аудан әкімдігіне жаңа демалыс маусымы басталғанға дейін ғимаратты жөндеу, оңалту орталығының балансына өткізіп беру жұмыстарына қатысты тиісті шаралар қабылдауды тапсырды. Облыс әкімінің баспасөз қызметінің мәліметінше, әлеуметтік маңызы бар нысанды ашуға жергілікті бюджеттен 230 млн теңге бөлінген. Бұл қаражатқа қараусыз қалған ғимаратты ретке келтіріп, қажетті жабдықтар мен жи­һаздар сатып алынды, іргелес аума­ғы абаттандырылды, балалар ойын ала­ңы салынды. Соның нәтижесінде былтыр «Жансая» балаларды оңалту орталығы ашылды. Орталық 50 орынға лайық­талған, әзірге онда Алакөл ауда­нының әр түкпірінен 21 бала барып жүр. «Инватакси» қызметтері де ұсынылады.

Ғажабы сол, мұнда ерекше қажет­ті­ліктері бар балалар облыстан тыс жерлерге шықпай-ақ ақысыз, тегін толық емдеу курсынан өтеді. Орталықта тірек-қимыл аппараты бұзылған, аутизм, Даун синдромы, церебралды сал ауруы диагнозы бар балаларды оңалту шаралары жүргізіледі. Оңалтуға бару үшін ВТЭК-тен тиісті жолдама мен жеке оңалту бағдарламасын алу қажет. Орталықта Монтессори кабинеті, физиотерапия, емдік денешынықтыру кабинеттері, массаж және сенсорлық бөлмелер жұмыс істейді, тұз шахтасы бар, психолог, логопед, дефектолог мамандар тиісті медициналық қызмет көрсетеді.

Облыстық жұмыспен қамтуды үйлес­тіру және әлеуметтік бағдарламалар бас­қармасының хабарлауынша, мұндай ор­талықтар Сарқан, Панфилов және Қаратал аудандарында жұмыс істейді. Кербұлақ ауданында да Балаларды оңал­ту орталығын ашу жоспарланған.