Сайрам елді мекеніндегі №3 Шымкент қалалық ауруханасында ТЖ департаментінің жедел-құтқару жасағының қызметкерлері баланың қолын электр ет тартқыштан босату бойынша бірегей операция жүргізді, деп хабарлады turkystan.kz.
Otyrar.kz сайтының мәліметінше, «112» құтқару қызметіне 3 жасар баланың қолы электр ет тартқышына қысылып қалғаны туралы хабарлама түскен. Дәрігерлер баланың қолын шығара алмағандықтан, құтқарушылардың көмегіне жүгінген.
Ата-анасының айтуынша, электр тартқышпен жұмыс істеу барысында бала қастарында болған.
«Құтқарушылар операцияны дәрігерлермен бірге жүргізді. Төтенше жағдай қызметкерлері авариялық-құтқару құралының көмегімен ет тартқыштың корпусын мұқият кесіп, қолын босатты. Бұл сәтте баланы наркоз арқылы ұйықтатқан. Қазіргі уақытта бала №1 қалалық балалар клиникалық ауруханасында реанимация бөлімінде жатыр», – делінген хабарламада.