«Қызылорда-Жезқазған» автожолы қайта жаңғыртылуда

«Президент Қасым-Жомарт Тоқаев қазан айындағы сапарында өңір үшін маңызды мәселелерге қатысты тарихи шешімдер қабылдады. Бірінші көптің көкейінде жүрген «Батыс Еуропа – Батыс Қытай» халықаралық дәлізінің Ақтөбе қаласына дейінгі аумақты 1 санатқа ауыстыру болатын. Бұл жөнінде Мемлекет басшысы Үкіметке мәселені тез арада шешуді тапсырды», – деді Нұрлыбек Нәлібаев Орталық коммуникациялар қызметінде өткен баспасөз мәслихатында.

Екінші мәселе – облыс орталығы Қызылорда қаласын ыстық сумен қамтамасыз ету болған. Бұл да Президент қолдауымен алдағы үш жыл ішінде кезең-кезеңімен шешілетін болды.

«Қоғамда жиі қозғалған «Қызылорда-Жезқазған» автожолы Президенттің тікелей тапсырмасымен қайта жаңғыртылуда. Жоба құны – 108 млрд 500 млн теңге. Қызылорда облысының аумағына тиесілі 216 шақырым жолдың 104 шақырымы аяқталды. Жалпы биыл республикалық және облыстық бюджеттен барлығы 38,5 млрд теңге бөлініп, ұзындығы 671 шақырымды құрайтын жол жөндеуден өтті. Нәтижесінде облыстағы жақсы жағдайдағы жолдың үлесі 87,5 пайызға жетті. Ал 2024 жылы сапалы жолдардың үлесі 92 пайызға жетеді», – деді облыс басшысы.

Облыс әкімі «Қызылорда-Жезқазған» жолын жаңғырту жобасы 2025 жылға дейін жоспарланғанын жеткізді.

«Шынында да бұл өте өзекті мәселе болып келді. Қызылордадан шыққан азаматтарымыз сапасыз жолмен Астанаға бір тәулік бойы жүріп баратын. Келесі жылы бұл жұмыстар жалғасады. Мүмкіндігінше келесі жылы аяқтаймыз деп үміттенеміз. Осы жолды жаңғырту аяқталса, Астанаға жету уақыты 11 сағатқа дейін қысқарады. Сонда тек қызылордалықтар ғана емес, Түркістан облысы, Шымкент қаласы, ақтөбеліктер де Астана мен солтүстік өңірлерге осы жолмен қатынайтын болады. Бұл өңірлер арасындағы байланыстың нығаюына үлкен септігін тигізеді және біздің қатаң бақылауымызда», – деді Н. Нәлібаев.