Егіске несие беру жалғасып жатыр

Республикалық бюджеттен бөлінген алғашқы транш 70 млрд теңге корпорацияның шотына түскен. Қаржыландырудың көп бөлігі 5,8 млрд теңге несие серіктестіктері арқылы беріл­ген. Микроқаржы ұйым­дары арқылы фермерлер 800 млн теңге рәсімдеді. Биыл несие алуды жеңілдету және жеделдету мақсатында Аграр­лық несие корпорациясы қар­жылан­дыруды тек несие серіктес­тіктері, екінші деңгейдегі банктер және микроқаржы ұйымдарын қор­лан­дыру арқылы жүзеге асырып жатыр. Несие қаражаты қаржы ұйым­дарына 1,5 пайыз жылдық сыйақы мөлшерлемесімен және 1,5 пайыздан басталатын жылдық тиімді сыйақы мөлшерлемесімен беріледі. Ал қаржы ұйымдары шаруа­шылықтарға несиені жыл­дық 5 пайызға дейінгі сыйақы мөлшер­лемесімен рәсімдейді.

«Бұл қаражат жанар-жа­ғармай, ауыл шаруашылығы тех­никасын жөндеуге қажетті қосалқы бөлшектер, минералды тыңайтқыш, тұқым сатып алуға және егін егу мен жинауға арналған өзге де іс-шараларға жұмсалуға тиіс. 2022 жылдан бас­тап бағдарлама шарттары бо­йынша алғаш рет несиелеу мерзімі келесі жыл көктемінің басына дейін ұзартылды. Бұрын несиелеу мерзімі қаржыландыру жылымен шектелген еді», деп хабарлайды «Бәйтерек» холдингі.

Сонымен қатар оңтүстік ай­мақ­­­тар алғаш рет өткен жылдар­дағыдай сәуір айында емес, алдын ала, яғни былтыр желтоқсанда қаржы­лан­дырылды. Сондай-ақ 1 гектар­ға жұм­салатын шығыстар норма­тиві­­нің мөлшері орта есеппен 25 пайызға көбейтілген.

«Бәйтерек» ұлттық Басқару­шы хол­дингі» АҚ басқарма төраға­сы­ның бірінші орынбасары Нұрбо­лат Айдап­келовтің айтуынша, 2022 жылы ауыл шаруашылығы 9 пайыз­ға өсім көрсетті. Оның алдында орташа өсу қарқыны 3-4 пайыз болған.

«Геосаяси оқиғаларға және олардың салдарына қарамастан өнеркәсіп өсіп отыр. Бұған өсімдік шаруашылығы айтарлықтай үлес қосты. Мәселен, дәнді және дәнді-бұршақты дақылдар өнімі 39 пайызға – 22,8 млн тоннаға дейін артты, оның ішінде бидай 44 пайызға – 17 млн тоннаға дейін артты. Майлы дақылдардың өнімі шамамен 17 пайызға – 2,8 млн тоннаға дейін, көкөністер 4 пайызға – 4,9 млн тоннаға дейін артты. Мал шаруашылығына да көрсеткіштер өсті. Ірі қара мал басы 2,5 пайызға – 8,4 млн басқа, қой 2,2 пайызға – 19 млн басқа, құс 3,8 пайызға – 49,5 млн басқа дейін өсті. Бұл деректерге қарасақ, ауыл шаруашылығы сырт­қы дағдарыстарға төтеп бере алатынын және әрі қарай даму үшін негізі мықты екенін көрсетті», дейді ол.

Үкімет басшысы Әлихан Смайы­ловтың айтуынша, биыл егіс жұмыстарына 413 мың тонна дизель отыны қажет.

«Бұл өткен жылы бөлінген көлемнен 13 мың тоннаға көп. Қазір­гі уақытта облыстарды мұнай өңдеу зауыттарына бекіту кес­тесінің жобасын әзірлеу, сондай-ақ егіс жұмыстарына жос­парланатын дизель отынының көлемі мен бағасын келісу жүр­гізіліп жа­тыр. Көктемгі науқанды тех­ни­ка­лық қамтамасыз ету бөлі­гінде ауыл шаруашылығы құры­лым­дарында 141,7 мың трактор, 4 300 бірлік жоғары өнімді егіс кешені, 73,2 мың сепкіш, 221,2 мың топырақ өңдеу машинасы бар», деді Премьер-министр депутат сауалына берген жауабында.