Қызылорда қаласындағы «Локомотив» стадионының қаңырап бос қалғанына бірнеше жыл болды. Бір кездері талай балғын доп теуіп, көптеген талантты аяқдопшы шыңдалған ойын алаңының бүгінгі күйі көптің наразылығын туғызып тұр.
Себебі тозығы жеткен алаңды жөндеуден өткізіп, «тотықұсша таранған кейіпке енгіземіз» деген мердігердің жасаған жұмыстары талапқа сай болмай шықты.
Жалпы, аталмыш стадионға жөндеу жұмыстары 2020 жылы қолға алынады. Сол жылдың мамыр айында жөндеу жұмыстары басталып, нысан желтоқсан айында қабылданған. Алаңның құрылыс жұмыстарымен «Агроспецстрой» ЖШС айналысыпты. Бұл жұмыстарға 300 млн теңге жұмсалыпты. Алайда мердігер тарапынан жөндеу жұмыстары талапқа сай емесі кейін өздігінен байқала бастайды. Бұл жерде бар гәп төселген жасанды алаңның сапасыздығында болып тұр. Уақыт өте келе алаңға төселген жасанды төсеніш өздігінен ажырап, пайдалануға жарамсыз күйге түскен. Жұмысшылар осы төсеніштерді қайта біріктіруге әрекеттеніп әуре. Соның салдарынан әзірге алаңды балалар игілігіне беру мүмкін болмай жатса керек.
Бұл олқылық қаладағы №6 мамандандырылған спорт мектебінің шәкірттерін тығырыққа тіреп тұр. Бүгінде спорт мектебіндегі 500-дей жас аяқдопшы көпқабатты үйлердің аулаларындағы шағын алаңдарда доп тебуге мәжбүр. Мұндай келеңсіздікке спорт мамандары да наразы. Жауапты мердігердің жауапсыздығына көптің көңілі толмайды.
Ал тапсырыс беруші мекеме Қызылорда облыстық Құрылыс, сәулет және қала құрылысы басқармасы тарапынан жөндеу жұмыстарындағы олқылықтар жөнге келтірілетінін алға тартып отыр. Бұл жайында басқарманың баспасөз қызметінің маманы Лаура Дастанбек былай дейді.
«Қызылорда қаласы Сүлейменов көшесі №69 мекенжайындағы №6 облыстық олимпиадалық резервтің мамандандырылған балалар-жасөспірімдер мектебіне қарасты футбол алаңын қайта жаңғырту» жұмыстары облыстық Құрылыс, сәулет және қала құрылысы басқармасы арқылы жүзеге асырылған. Мердігер тарапынан шарт талаптарын тиісінше орындамау себебінен «Агроспецстрой» ЖШС-ын мемлекеттік сатып алудың жосықсыз қатысушысы деп тануға, айыппұл өндіруге Қызылорда облысының мамандандырылған ауданаралық экономикалық сотына талап арыз жолданған. Нәтижесінде, 2021 жылдың қаңтар айында судья З.Жарылқасынованың ұйғарымымен талап арыз қайта қарау құқығынсыз қалдырылды. Оны Қазақстан Республикасының Жоғарғы Соты жалпы отырысының 2020 жылғы 6 мамырдағы №9 қаулысымен бекітілген Төтенше жағдайдың енгізілуіне байланысты сот практикасының жекелеген мәселелері бойынша №1 түсіндірменің 9 сұрағында, өнім берушіні мемлекеттік сатып алудың жосықсыз қатысушысы деп тану және айыппұл санкцияларын өндіру туралы талап қоюға тыйым салу жөніндегі Қаулының 9-1-тармағының бірінші бөлігі төтенше жағдайдың енгізілуіне байланыстырған», – дейді бізге басқарма өкілі.
Жалпы мәліметке сәйкес, спорт алаңы сапасына байланысты құзырлы орындар тарапынан бір жылдан астам уақыт бойынша жүргізілген тексеру нәтижесінде ешқандай заңбұзушылық анықталмаған. Ал нысанды сапасыз күйде қалай қабылдағаны көпке жұмбақ күйінде қалып тұр.
Негізінен, бұл мәселеге байланысты 2021 жылдың мамыр айынан бастап облыстық прокуратура қылмыстық іс қозғаған. Соның негізінде Қызылорда облысы бойынша Сыбайлас жемқорлыққа қарсы қызмет департаменті мен сот құрылыс сараптамасы, сот тауартану сараптамасы және Қызылорда облысы бойынша Мемлекеттік ішкі аудит департаментін тарту арқылы аудиторлық және эксперттік тексерулер жүргізілген.
Осындай тексеруге байланысты 2021 жылдың мамыр айынан желтоқсан айына дейінгі аралықта спорт нысаны уақытша спорт шараларын өткізуге тоқтатылған. Тексеру нәтижесі бойынша сот құрылыс сараптамасы және сот тауартану сараптамасының қорытындысымен мемлекетке шығын келмегені анықталып, қылмыстық іс 2022 жылдың желтоқсан айында қысқартылған.
Басқарманың мәлімдеуінше, қазір нысанның құжаттарын басқарманың теңгерімінен облыстық Спорт басқармасының теңгеріміне өткізу жұмыстары жүргізілуде екен. Дей тұрғанмен, басқарма спорт алаңындағы сапасыз жұмыстар қайта қалпына келтірілетінін жеткізді.
«Футбол алаңын қайта жаңғырту жұмыстарынан кейін 2 жыл ішінде болған кемшіліктер реттеледі. Мердігер тарапынан құрылыс кезінде жіберілген олқылықтарды жою көзделген. Осыған сәйкес, бүгінгі күні құрылыс мердігері ақауларды қайта қалпына келтіру жұмыстарын жүргізуде», – деп түсіндірді басқарма тарапынан.
Спорт жанашырлары нысанды бүгінгідей күйде пайдалануға беруге болмайтынын айтып отыр. Сапасыз алаңда доп тебу балғындардың денсаулығына үлкен зиян тигізуі мүмкін.
Ал жергілікті жұртшылық сыры кеткен спорт алаңындағы кемшіліктердің толықтай қалпына келтірілуін күтеді. Жөндеуге бөлінген қыруар қаржы желге ұшпай, сапалы спорт алаңы ел игілігіне пайдалануға берілуге тиіс деп есептейді. Бұл – спорт жанашырларының да, балғын спортшылардың да басты талабы.
Ербақыт ЖАЛҒАСБАЙ,
Қызылорда облысы