АСТАНА. ҚазАқпарат – 2024 жылдан бастап Төтенше жағдайлар министрлігі салынып жатқан үйлердің өрт қауіпсіздігін тексеруді бастайды. Бұл туралы ведомство басшысы Сырым Шәріпханов мәлімдеді, деп хабарлайды ҚазАқпарат тілшісі.
«Біздегі мәселе мынада: тұрғын үйлер салынып жатыр, ал ТЖМ-де сертификаттауды, нысандарды тексеруді алып тастаған. Бұл мәселе қашан шешіледі?» — деп сұрақ қойды тілшілер Үкіметтің кулуарында.
«Бұл мәселе жаңа жылдан бастап шешіледі. Біз жобаларды келісуге, ғимараттарды, құрылыстарды қабылдауға, сондай-ақ тексеру кезінде тікелей қатысатын боламыз», — деп қысқаша жауап берді ТЖ министрі Сырым Шәріпханов.
Яғни, қаңтар айынан бастап үй салу бойынша барлық жобаларды Төтенше жағдайлар министрлігі тексереді.
Еске сала кетсек, 1 тамыз күні Алматыда 16 қабатты үй өртенген еді. Амалы қалмаған тұрғындар балаларын терезеден лақтырған.
Өрт салдарынан 1 адам көз жұмып, 43 адам зардап шеккен.