Астана қаласында жастардың колледжде білім алуы үшін қандай жағдайлар жасалып жатыр? Елорда әкімінің орынбасары Есет Байкен қаланың Коммуникациялар қызметінде өткен брифингте мәлім етті, деп хабарлайды Астана әкімдігінің ресми сайты.
Қазіргі уақытта елордада 32 колледж бар. Оның 9-ы – мемлекеттік, 23-і – жекеменшік. Кадрларды даярлау 75 мамандық және 122 біліктілік бойынша жүзеге асырылады.
Қазіргі уақытта қаланың барлық колледжіндегі кабинеттерге, шеберханалар мен жатақханаларға жөндеу жүргізілді, білім беру бағдарламалары өзектендірілді, педагогикалық штат жасақталды. Бүгінгі таңда 18 жатақханаға 2696 студент орналастырылды.
«Биылғы оқу жылы «Баршаға арналған тегін кәсіптік техникалық білім беру» жобасы шеңберінде 8500 грант орналастырылды.
Өткен жылмен салыстырғанда 1200 орынға көбейді.
Осы оқу жылында алғаш рет пилоттық жоба шеңберінде қаланың 170, 10-11 сынып оқушыларына арналған эксперименттік білім беру бағдарламалары бойынша қабылдау жүзеге асырылды.
Аталған эксперимент бойынша оқушылар 1,5 жылдан кейін білім туралы аттестаты мен жұмысшы мамандығы бойынша дипломды қоса алып шығады», – дейді Есет Байкен.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
