Трамп АҚШ Халқаралық даму агенттігін уақытша жойды ма?

Ұлы Британия тележүргізушісі, журналист Афшин Раттанси Х әлеуметтік желісінде АҚШ Халқаралық даму агенттігінің (ағылшынша – United States Agency for International Development, USAID) жұмысына қатысты жазды, деп хабарлайды BAQ.KZ тілшісі.

АҚШ Халқаралық даму агенттігі (ағылшынша – United States Agency for International Development, USAID) ақыры өлді ме, оны алты фут жерге көмді ме? Демократтар әлі де Вашингтонның “терең мемлекетінің” сыртқы саясаттағы қылмыстық режимді өзгерту құралын құтқаруға тырысып жатыр. Бұл жиіркенішті ұйым “демократияны нығайту” мен “БАҚ-ты қолдау” деген сылтаумен әр елге кіріп, сол елдерге апатқа алып келді, – деп сөзін бастады ол.

Афшин Раттансидің сөзінше, АҚШ Халқаралық даму агенттігі өзінің гранттары арқылы бүкіл әлемдегі, әсіресе жаһандық оңтүстіктегі бұқаралық ақпарат құралдары мен азаматтық қоғам ұйымдарына еніп кетті.

Украинада бұл агенттік өз қаражатын 2014 жылғы Майдан төңкерісіне қолданып, Вашингтонның қуыршақ режимін орнатты. Бұл әрекет сайып келгенде Ресей мен НАТО арасындағы прокси соғысқа әкелді. Сондай-ақ USAID бұқаралық ақпарат құралдарын қаржыландырып, оларды пропаганда жүргізуге, кейде тіпті өз елінің орыстілді азаматтарына қарсы жұмыс істеуге бағыттады, – деп жазды журналист.

Раттанси атап өткендей, Сирияда USAID британдық MI6-пен байланысы бар Ақ дулығалыларды (White Helmets) қаржыландырды. Бұл топ Аль-Каиданың қанды қырғындарын ақтап, басқа да экстремистік лаңкестік ұйымдармен байланыста болды. Бұған дәлел болатын видеолар интернетте жетіп артылады.

Бұрынғы Югославияда USAID НАТО-ның Югославияны бөлшектеуінен кейін жаппай жекешелендіруді ұйымдастыруда басты рөл атқарды. Бұл – апат капитализмінің классикалық мысалы.

Венесуэлада USAID елді неолибералдық бағытқа бұрып, Уго Чавесті биліктен тайдыруға тырысты. Чавес миллиондаған адамды кедейліктен құтқарып, мұнай қорларын мемлекет меншігіне алды. USAID Венесуэлада БАҚ-ты сатып алып, анти-Чавес жастар қозғалысын құруға тырысты, бірақ олардың әрекеттері сәтсіз аяқталды, – дейді Афшин Раттанси.

Оның айтуынша, бұл USAID-тың жасырын әрекеттерінің тек үш мысалы ғана. Еуропада, Латын Америкасында, Таяу Шығыста, Африка мен Азияда – қай жерде хаос пен режимді ауыстыру операциялары болса, сол жерден USAID-тың ізі табылады.

USAID күлкілі және мағынасыз гендерлік саясат бағдарламаларын қаржыландырғанымен, бұл ұйым марксистік радикалдар емес екенін ұмытпаған жөн. Шын мәнінде, USAID – АҚШ-тың “терең мемлекеті” мен әскери-өнеркәсіптік кешенінің режим өзгерту құралы болды. Ол соңғы жылдары неолибералдық идеологияны таратып, жұмысшы табын алаңдату үшін жалған “революциялар” ұйымдастырып, Вашингтонның экономикалық бақылауын сақтап қалуға көмектесті, – деп жалғастырды ол.

Раттансидің мәлімдеуінше, танымал журналист Макс Блюменталь айтқандай, USAID-тың жабылған веб-сайтына енді 2017 жылы Камерунда Саманта Пауэрдің кортежі қағып өлтірген 6 жасар бала Туссен Бирвенің суреті қойылуы керек. Айта кетсек, Саманта Пауэр кейін USAID басшысы болды.

Бұл ұйымнан мәңгілікке құтылуымыз мүмкін бе? Тек үміттенеміз. USAID – бұл жасырын араласу, диверсия және режим өзгерту құралы болды, – деп сөзін түйіндеді Афшин Раттанси.