Бүгін Батыс Қазақстан облысында ветеринариялық қызмет сапасын арттыруға бағытталған маңызды шара өтті. Облыс әкімі Нариман Төреғалиевтың қатысуымен ауылдық округтердегі ветеринар мамандарға 106 бірлік қызметтік автокөліктің кілтін табыс ету рәсімі оздырылды. Бұл көліктер заманауи ветеринариялық құрал-жабдықтармен толық жабдықталған және елді мекендерде ветеринариялық қызметтің жылдам әрі тиімді болуын қамтамасыз етпек.
Аталған іс-шара Мемлекет басшысының ветеринария саласын дамыту жөніндегі тапсырмаларын орындауға бағытталған жүйелі жұмыстың бір бөлігі болып табылады. Ветеринариялық ұйымдарға жаңа автокөліктерді табыстау – ауыл шаруашылығының қауіпсіздігін қамтамасыз етуге, мал ауруларының алдын алуға және ветеринариялық бақылауды күшейтуге сеп болады.
«Өңірімізде ветеринариялық ұйымдардың материалдық-техникалық базасын ветеринариялық пункттермен, мал қорымдарымен, автокөліктермен жабдықтау жұмыстары жүзеге асырылуда. Соңғы екі жылда халықтың өмірін қамтамасыз ететін салалардың материалдық-техникалық базасын жақсарту үшін облыстық бюджеттен 10 млрд теңгеге төтенше жағдай, орман шаруашылығы, коммуналдық шаруашылығы, ветеринария, білім мен денсаулық салаларына 700-ге жуық арнайы техникалар сатып алынған болатын. Ал биыл облыс бойынша 5 миллиард теңгеге жуық қаражатқа 200-ге жуық арнайы техника сатып алу жоспарланып отыр. Соның аясында жуырда «Батысирригация» мекемесіне 18 бірлік, бүгін ветеринариялық станцияларға 106 арнайы техника берілді», – деді облыс әкімі Нариман Төреғалиев.
Бұл бастамалар өңірдегі ветеринариялық және аграрлық инфрақұрылымды жаңғыртуға бағытталған маңызды қадамдардың бірі.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
