Астанада Жастар күніне орай «Bir Tolqynda» диалог алаңы өтті. Іс-шараны елордалық «Жастар рухы» жастар қанатының филиалы Байқоңыр ауданы әкімдігімен бірлесіп ұйымдастырды, деп хабарлайды елорда әкімдігінің ресми сайты.
Іс-шараға шамамен 150 жас қатысты. Бұл орын танымал спортшылармен еркін пікір алмасуға мүмкіндік берген нағыз байланыс алаңына айналды. Әсіресе, «Барыс» хоккей клубының шабуылшысы Әлихан Әсетовтің үлкен спортқа келу жолы туралы әңгімесі ерекше қызығушылық тудырды.
«Менің кәсіби карьерам Өскеменде, «Торпедо» хоккей клубының мектебінде басталды. 2012/2013 маусымында Ресей біріншілігінде дебют жасап, Қазақстан чемпионатында «Казцинк-Торпедо-2» сапында алғашқы матчымды өткіздім – бұл менің кәсіби хоккейдегі бастауым болды», – деді Асетов.
Іс-шара барысында жас қатысушылар сұрақтарын қойып, мотивация, спорт және жетістік тақырыптарында әңгіме өрбітті. Кездесу соңында Әлихан Әсетов жастарды спортпен айналысуға, салауатты өмір салтын ұстануға және елі үшін адал еңбек етуге шақырды.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
