Ертең, 21 тамыз күні сағат 11:00-де, Qyzyljar Creative Center қабырғасында жылдағы ең әсерлі де шабыттандырар шаралардың бірі – «Мерейлі отбасы» ұлттық конкурсының өңірлік кезеңі өтпек.
Бұл байқау СҚО әкімдігінің Ішкі саясат басқармасының мемлекеттік әлеуметтік тапсырысы аясында «Болашақ» ҚҚ-ы арқылы жүзеге асырылуда. Конкурстың басты мақсаты – қоғам өміріндегі отбасының орасан рөлін айшықтау. Өйткені отбасы – барлық құндылықтардың бастауы, рухани тірек пен келер ұрпақты тәрбиелеудің негізі.
28 отбасы – баршаға үлгі
Биыл сайысқа 28 отбасы қатысады. Олар – аудандық және қалалық кезеңдердің жеңімпаздары. Өздерінің еңбегімен, дәстүрге берік көзқарасымен, шығармашылығы мен ынтымағымен отбасы құндылықтарының қоғамдағы орнының берік екенін дәлелдеп жүрген жанұялар. Олардың арасында ұстаздар мен дәрігерлер, кәсіпкерлер мен ауыл шаруашылығы еңбеккерлері, шығармашылық иелері мен қоғам белсенділері бар.
Әр отбасы өмірін бала тәрбиесіне, құндылықтарды сақтауға және туған жерді дамытуға арнаған. Олардың тарихы – махаббаттың, қамқорлықтың, еңбектің және Отанға адалдықтың тарихы.
Байқау номинациялары
Марапаттау рәсімі келесі номинациялар бойынша өтеді:
«Ел игілігі жолындағы еңбек» – өңір мен елдің дамуына үлес қосып жүрген еңбек адамдарына.
«Шығармашылықтың сан қыры» – өнерімен шабыт сыйлаған отбасыларға.
«Балалар – Қазақстанның болашағы» – елдің лайықты азаматын тәрбиелеп отырған жанұяларға.
«Менің отбасым – менің байлығым» – бірлікті сақтап, дәстүрді жалғастырып жүрген әулеттерге.
«Ата-ана даңқы» – өскелең ұрпаққа үлгі болар ата-аналарға.
«Ұрпақ тәрбиесі» – үлкенге құрмет, кішіге ізеттілік дәнекер болған жанұяларға.
Барлық қатысушылар алғыс хаттармен, I, II, III дәрежелі дипломдармен, сыйлықтар мен сертификаттармен марапатталады. Ал өңірлік кезеңнің жеңімпазы құрметті I орынды иеленіп, Солтүстік Қазақстан облысының намысын республикалық «Мерейлі отбасы» байқауында қорғайтын болады.
Неліктен бұл маңызды?
«Мерейлі отбасы» – жай ғана конкурс емес. Бұл – ұрпақтарды жалғайтын, қоғамдағы бірлікті нығайтатын, отбасы құндылықтарының Қазақстан болашағы үшін берік іргетас екенін паш ететін алаң. Қатысушылардың өмір жолы жеке үлгінің қоғам дамуымен қаншалықты байланысты екенін айқын көрсетеді.
Ертең Qyzyljar Creative Center қабырғасы ардақты отбасыларды, қоғам өкілдері мен қала тұрғындарын, сондай-ақ бұқаралық ақпарат құралдарының назарын тоғыстыратын жылы жүзді мерекелік ордаға айналады. Мұнда «отбасы» ұғымы – мейірімнің, қолдаудың және жарқын болашақтың символы ретінде айшықталмақ.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
