Алматыда 14 медициналық ұйым жанынан жастар денсаулық орталығы ашылды

Алматыда 14 медициналық ұйым жанынан жастар денсаулық орталығы ашылды. Мұнда 10 бен 29 жас аралығындағы қала тұрғындары міндетті әлеуметтік медициналық сақтандыру (МӘМС) аясында медициналық, психологиялық және әлеуметтік көмек ала алады. Бұл туралы Алматы қаласы Қоғамдық денсаулық басқармасында хабарлады.

Мұндай орталықтардың негізгі міндеті – жасөспірімдер мен жастарға дәрігерлер мен психологтардан кеңес алуға, жеке және әлеуметтік мәселелерді шешуге, салауатты өмір салты туралы білім алуға мүмкіндік беретін сенімді орта қалыптастыру. Мұнда өтініштердің құпия түрде қарастырылуына кепілдік беріледі.

Репродуктивті денсаулыққа, жыныстық жолмен берілетін инфекциялардың алдын алуға және отбасыларға психологиялық қолдау көрсетуге баса назар аударылады. Жеке консультациялардан басқа мамандар тренингтер, семинарлар, спорттық және мәдени іс-шаралар ұйымдастырады.

№36 қалалық емхана жанындағы «Салауатты жастар» орталығы сондай табысты жобалардың бірі. Былтыр ғана бұл орталықтың қызметін шамамен 2,5 мың алматылық пайдаланған. Оның базасында құрылған еріктілер клубында Наурызбай ауданының оқушылары топпен жұмыс істеуді, көшбасшылықты және әлеуметтік жобаларды жүзеге асыруды үйренеді.

«Бұрын дәрігерге сұрақ қоюға қымсынатынмын. Ал бұл орталықта өзімді еркін сезінемін. Мұндағы мамандардың бәрі ашық-жарқын. Әңгімелесіп, сырласуға да болады. Бұл маған үлкен қолдау береді», – дейді орталыққа келуші жастың бірі.

Айта кетейік, жастар денсаулық орталықтары №4, 5, 7, 11, 12, 16, 23, 26, 29 және 36 қалалық емханаларда, сондай-ақ, Медеу аудандық ҚПМСК-де, «Almaty clinic» медициналық орталығында, ҚАҰӨО мен «Медсервисхирургияда» жұмыс істеп тұр. Бұл орталықтарға жасөспірімдер мен жастар тіркеуіне немесе тұрғылықты жеріне қарамастан жүгіне алады.