Алматыда тоғызқұмалақтан жасөспірімдер арасында әлем чемпионаты өтеді

2025 жылы 17-23 қараша аралығында Алматы қаласында U-15 және U-17 жасөспірімдер арасында тоғызқұмалақтан әлем чемпионаты өтеді. «Зенит» спорт орталығында (Алматы қ, Санаторная көшесі, 14а) өтетін әлемдік додаға 21 елден жас спортшылар қатысады.

Чемпионат 18 қараша күні сағат 14:00-де жарыс өтетін жерде салтанатты түрде ашылады.

Тоғызқұмалақ — көшпелі халықтардың ежелгі зияткерлік ойындарының бірі, мәдени мұра ретінде танылған құндылық. Алматы қаласы әлем қауымдастығының назарын қайта өзіне аудармақ: тоғызқұмалақтың жас шеберлері жоғары дайындық деңгейін және стратегиялық ойлау қабілетін паш етпек.

Жарыс үш форматта өтеді: классика (онлайн және офлайн), рапид және блиц.

Қатысушылар жеке және командалық сында бақ сынайды.

Әлем чемпионаты Алматы қаласы әкімдігінің қолдауымен ұйымдастырылады.

Естеріңізге сала кетсек, алғашқы әлем чемпионаты 2023 жылы Алматыда өтіп, оған 17 мемлекеттен 136 спортшы қатысқан болатын. Ал биыл турнир ауқымы кеңейіп, 21 елден 180 жас ойыншы қатыспақ. Олардың қатарында Орта Азия елдерімен қатар Моңғолия, Пәкістан, Қытай, Үндістан, Германия, Италия, Корея, Түркия және Шығыс Еуропа мемлекеттерінің спортшылары бар.

Чемпионат 22 қараша күні сағат 14:00-де «Зенит» спорт орталығында ресми түрде жабылады.