Халықтық штаб мүшелері Қабиболла Сыдиықұлы атындағы кітапхананың қызметкерлерімен кездесіп, АЭС құрылысының елімізге қажеттілігі туралы түсіндірме жұмыстарын жүргізді. Сонымен қатар, 6 қазанда өтетін референдумға қатысып, саналы түрде таңдау жасауға шақырды. Бұл туралы Қоғамдық коммуникация орталығы хабарлайды.
— Маңғыстау ел экономикасына ауқымды үлес қосып отырған өңір. Қара алтынды алудың өзі өте көп энергияны қажет етеді. Сонымен қатар, азық-түлік, энергетика, ауыз судың қауіпсіздігі және басқа да мәселелер жетерлік. Ал АЭС құрылысы салынса жағдай өзгереді. Өйткені атом электр станциясы өзінің қолтаңбасын барлық салада қалдырады. Сондықтан, әрбір азамат жауапкершілікпен референдумға қатысу керек, — деді халықтық штаб мүшесі, облыстық мәслихат депутаты Абзал Ғабитұлы.
Іс-шара барысында кітапхана қызметкерлері белсенділік танытып, пікір алмасып, бірнеше сұрақтар қойды. Оған халықтық штаб мүшелері толыққанды жауап берді.
