«Темірші қысы – 2026»: Қарқаралы ауданында оқушылар арасындағы үздік шаңғышылар анықталды

Қарқаралы ауданы Темірші ауылдық округіне қарасты Қарағаш ауылында оқушылар арасында аудандық қысқы жарыстар өтті. Байрақты бәсекеге Қарқаралы қаласынан, Томар, Қасым және Қарағаш ауылдарынан келген мектеп оқушылары қатысты.

Аудан орталығынан 180 шақырым қашықтықта орналасқанына қарамастан, ғасырдан астам тарихы бар Қарағаш ауылындағы мектеп жыл сайын жоғары спорттық нәтижелер көрсетіп келеді. Оқу орны аудандық және облыстық деңгейдегі шаңғы жарыстарында тұрақты түрде жүлделі орындарға ие болып жүр.

Ұйымдастырушылардың айтуынша, тоғызжылдық мектеп оқушыларының ата-аналары он жылдан астам уақыт бойы қысқы спорт түрлерін дамытуға ерекше көңіл бөліп келеді. Ата-аналардың қолдауының арқасында балалар шаңғымен және қажетті спорттық құрал-жабдықтармен толық қамтамасыз етілген, ал жарыстардың өзі ауыл тұрғындары үшін ортақ іске айналған.

«Темірші қысы – 2026» аудандық жарыстары ауыл тұрғындары мен педагогикалық ұжымның ұйымшыл еңбегінің нәтижесінде жоғары деңгейде өтті.

— Ұйымдастырушыларға зор алғысымды білдіремін, барлығы егжей-тегжейлі ойластырылған. Әсіресе балалардың көзіндегі жеңіске деген жігер мен қызығушылық қуантады. Мұндай жарыстардың өтуі өте маңызды, — деді танымал марафоншы әрі жаттықтырушы Думан Бейсенбаев.

Жарыс қорытындысы бойынша жүлделі орындарға ие болғандар:

– 3–5 сыныптар арасында — Нұраят Мүшкеев пен Шакизат Жұмағазы;

– 6–7 сыныптар арасында — Кирилл Корнукий мен Бибінұр Мұси;

– 8–9 сыныптар арасында — Нұралы Тиыштық пен Шырайлым Болатбекқызы;

– 10–11 сыныптар арасында — Ислам Еділбай.

Сондай-ақ Қарқаралы қаласының намысын қорғаған Дана Кәкібаева да жүлдегер атанды.

— Бұл жарыстар маған өте ұнады. Медальмен оралып, ата-анамды қуанту — үлкен мәртебе. Бірнеше жылдан бері шаңғы секциясына қатысып келемін, жарыстар мен ірі турнирлерге қатысқанды жақсы көремін, — деп бөлісті спортшы.

Жарыс жеңімпаздары мен жүлдегерлері Қарқаралы ауданының дене шынықтыру және спорт бөлімі атынан дипломдармен, медальдармен және кубоктармен марапатталды. Сондай-ақ жергілікті тұрғындардың қолдауымен ақшалай сыйлықтар табысталды.

Фото: Қарқаралы ауданы әкімдігі