«Таза Қазақстан»: AULAFIT әлеуметтік жобасының қатысушылары экологиялық акцияны қолдады

Астанада қала тұрғындарына жаттықтырушымен бірге тегін және тікелей өз ауласында спортпен шұғылдануға мүмкіндік беретін AULAFIT әлеуметтік жобасы жалғасып жатыр. Бүгін жоба қатысушылары таңғы жаттығуды экоакцияны қолдау мақсатында ерекше өткізді, деп хабарлайды елорда әкімдігінің ресми сайты.

Таңғы жаттығуға жиналған астаналықтар сенбілікке қажетті спорттық жабдықтармен түрлі жаттығу жасап, қалада өтіп жатқан «Таза Қазақстан» экологиялық акциясын қолдайтындарын білдірді.

AULAFIT әлеуметтік жобасының жетекшісі Айтжан Мусиннің сөзінше, алдағы уақытта өзге аулаларда да таңғы және кешкі жаттығу барысы қызықты өткізілмек.

«Бұл жоба осыдан төрт жыл бұрын бастау алып, еліміздің түкпір-түкпірінде кеңінен жүзеге асырыла бастады. Айтулы жоба арқылы қала тұрғындары жаттықтырушымен бірге тегін әрі өз үйінің ауласында спортпен шұғылдана алады. Оның аясында жаттықтырушылар күнделікті әр аулаға барып, футбол, баскетбол, волейбол сияқты командалық ойындар бойынша және жалпы физикалық дайындық бойынша жаттығулар жүргізеді. Қатысамын деушілердің жасына шектеу қойылмайды. Бүгіннен бастап барлық аула тұрғындары «Таза Қазақстан» ауқымды экологиялық акциясын қолдау мақсатында жаттығудан кейін аулаларын жинастырады. Одан бөлек жаттығу барысын да ерекше өткізді. Алдағы уақытта бұл үрдіс барлық аулада жалғасын табады», – дейді А.Мусин.

Бүгінде әлеуметтік жоба елордадағы 30 аулада жүзеге асып жатыр. Оған 3 мыңнан астам қала тұрғыны қатысып, күнделікті спортқа деген белсенділігін көрсетіп жүр. Солардың бірі – 66 жастағы Әділет Ерғалиева. Елорда тұрғыны жоба басталғалы таңғы және кешкі жаттығуларға тұрақты түрде қатысып келеді.

«Мен екі жұмадан бері, яғни осы жоба басталғалы таңғы жаттығуға қатысып жүрмін. Өте керемет жоба. Осында келіп, дене жаттығуларын жасаймыз. Әдетте үйде отырғанда мұндай жаттығуларды ескермейміз, дегенмен денсаулық үшін спортпен айналысу маңызды. Сондықтан да бұл жоба біз сияқты апаларға өте пайдалы. Бәріміз таңертең және кешке бір сағат бойы спортпен шұғылданамыз.

Жаттықтырушымыз – Жантөре мәдениетті және сыпайы жігіт. Ол бізге жаттығуды қалай дұрыс орындау керек екенін түсіндіріп, үйретіп жатыр. Біз апалар болып жоба ұйымдастырушыларына және жаттықтырушымызға алғыс айтамыз», – дейді Әділет Ерғалиева.

Айта кетейік, таңғы жаттығуға қатысушылар одан кейін аула аумағында тазалық жұмысын жасады.

Жалпы елордалықтар жаттықтырушымен тегін және тікелей аптаның әр дүйсенбі, сәрсенбі және жұма күндері қаланың 15 жерінде, ал сейсенбі бейсенбі, сенбі күндері өзге 15 аулада спортпен шұғылдана алады.

Яғни, таңғы сағат 9-дан бастап аға буын үшін, ұлдар мен қыздар үшін сағат 10:00-де жаттығулар өтеді. Ал кешке 17:00-ден бастап 6-10 жастағы балаларға арналған сабақтар, 18:00-де 11-15 жастағы балаларға арналған сабақтар және 19:00-де жастарға арналған жаттығулар өтеді.

Дүйсенбі, сәрсенбі және жұма күндері жаттығулар келесі мекен-жайлар бойынша өтеді:

1. Н. Тілендиев даңғ., 38;
2. Әнет баба, 11 – «Манхэтен» ТК;
3. Ш. Айтматов даңғ., 60 – «Мадрид» ТК;
4. Сарыарқа көш., 11;
5. Кенесары даңғ., 64 – «Дарын» ТК;
6. Сығанақ көш., 14 – «Шығыс ТК»;
7. С.Кубрин көш., 23/1 – «Европейский» ТК;
8. Ұлы дала, 31/1 – «Алпамыс» ТК;
9. Момышұлы даңғ., 12 – «Астана Меруерт» ТК;
10. Түркістан көш., 10 – «Көркем 2» ТК;
11. Қошқарбаев даңғ., 45;
12. Күйші Дина көш., 31 – «Мирас» ТК;
13. Сауран көш., 3/1 – «Сармат 1» ТК;
14. Мәңгілік ел даңғ., 19 – «Айсанам» ТК;
15. Қабанбай батыр даңғ, 59Б – «Будапешт» ТК.

Сейсенбі, бейсенбі, сенбі күндері спорттық жаттығулар келесі мекен-жайлар бойынша өтеді:

1. С 303 көш., 2 үй;
2. Ш. Айтматов даңғ., 36 – «Жағалау» ТК;
3. Қорғалжын тас жолы, 25 – «Елорда 2020» ТК;
4. Ш. Қосшығұлұлы көш., 20;
5. Пушкин көш., 15 – «Китайская стена» ТК;
6. Ж. Молдағалиев көш., 6;
7. С. Сейфуллин даңғ., 9 – «Джунгарские ворота» ТК;
8. Сарайшық көш., 34 – «Дипломат» ТК;
9. Құдайбердіұлы даңғ., 5;
10. Сауран көш.,5 – «Градкомплекс 2 ТК;
11. Қошқарбаев даңғ., 34 – «Түркістан» ТК;
12. Б.Майлин көш., 31 – «Апато» ТК;
13. Әл Фараби даңғ., 34/3 – «Nova City» ТК;
14. ⁠Бейбарыс сұлтан көш., 11 – «Qazanat River» ТК;
15. ⁠Айнакөл көш., 60 – «Барыс» ТК.