Астана мектептерінде 5-7-сынып оқушылары арасында қаржылық қауіпсіздік бойынша QARZHYSKILL чемпионаты басталды. Қатысушылар қаржылық және цифрлық сауаттылық жөніндегі білімін жетілдіріп, интернет-алаяқтықты анықтау мен жеке деректерін қорғау жолдарын үйренеді, деп хабарлайды Астана әкімдігінің ресми сайты.
Чемпионатты Астана қаласы бойынша Экономикалық тергеп-тексеру департаменті елорданың Білім басқармасымен бірлесіп, «Заң мен тәртіп» тұжырымдамасы және «Адал азамат» біртұтас тәрбие бағдарламасы аясында ұйымдастырды.
Жобаның негізгі мақсаты – оқушылардың қаржылық және цифрлық сауаттылығын арттыру, сыни ойлау қабілетін дамыту, алаяқтық схемалар мен ойынға тәуелділікке қарсы тұру дағдыларын қалыптастыру.
Чемпионат барысында оқушылар қаржылық және цифрлық қауіпсіздік бойынша білімін көрсетіп, түрлі жағдайларды талдау және дұрыс қаржылық шешім қабылдау қабілетін сынайды.
Астана қаласы бойынша Экономикалық тергеп-тексеру департаментінің аға жедел уәкілі Жарқынбек Мамалиновтың айтуынша, қаржылық және цифрлық қауіпсіздік дағдыларын орта буын сыныптарынан бастап қалыптастыру қажет.
«Қаскөйлер заманауи технологиялар мен психологиялық айла-тәсілдерді жиі пайдаланып, кәмелетке толмағандарды да нысанаға алады. Сондықтан балаларға қауіп туралы ескертіп қана қоймай, олардың цифрлық ортада қауіпсіз әрекет ету дағдыларын қалыптастыру маңызды.
Бала ықтимал қауіптерді неғұрлым ерте танып, ақпаратты сыни тұрғыдан бағалауды және жеке деректеріне жауапкершілікпен қарауды үйренсе, болашақта заңсыз схемалардың ортасында қалудан мүмкіндігі соғұрлым алыс болады», – деді ол.
Департамент өкілінің сөзінше, дропперліктің алдын алуға да ерекше мән беріледі. Оқушылар банк картасын, оның деректемелерін немесе банк қосымшасына кіру мүмкіндігін бөгде адамдарға беру ауыр құқықтық салдарға әкелуі мүмкін екенін түсінуі керек.
«Біздің міндетіміз – оқушыларға қауіп туралы ақпарат беріп қана қоймай, күнделікті өмірде кездесуі мүмкін жағдайларда дұрыс әрекет етуді үйрету. Мысалы, күмәнді хабарламалар, оңай ақша табу туралы ұсыныстар немесе ақша аудару мен банк картасының деректерін беру туралы өтініштер түскен кезде не істеу керегін түсіндіру», – деп атап өтті Жарқынбек Мамалинов.
Ұйымдастырушылардың пікірінше, мұндай бастамалар өскелең ұрпақтың қаржы мен цифрлық қауіпсіздікке жауапкершілікпен қарауын қалыптастырып, оқушыларды салмақты шешім қабылдауға және заманауи алаяқтық схемаларына қарсы тұруға үйретеді.