Алматы қалалық мәслихатының депутаттары Ұзынағаш ауылындағы «Арман дала» лагеріне барып, жағдайымен танысты. Бұл жайында депутат Нұргүл Тау әлеуметтік желіде жазды, деп хабарлады ҚазАқпарат сайты.
«Жазғы лагерьде баланың демалуына жағдай жасалмаған, өрескел бұзушылықтар орын алғанына куә болдым. Лагерь бұрынғы сауна ғимаратында орналасқан. Қызмет көрсетуші – «БелРичи» ЖШС. Мемлекеттік сатып алу шартына сәйкес қызмет көрсету құны – 107,8 млн теңге. Жоспар бойынша 1150 бала демалыспен қамтылуы тиіс. Мемлекеттік сатып алу процедурасы қалай жүргізілгені төңірегінде мәселе туындауына байланысты өз тарапымнан ҚР Бас прокуратурасына, Сыбайлас жемқорлыққа қарсы іс-қимыл агенттігіне, Қаржы министрлігінің Ішкі мемлекеттік аудит комитетіне тексеру жүргізу жөнінде сауал жолданды. Бұл мәселені өз бақылауыма алдым» деп жазды депутат.
Оқу-ағарту министрлігінің ақпараты бойынша, жақын арада балалар басқа демалыс лагерьлеріне жіберіледі.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
