Алматы облысының Жамбыл ауданында қой бағып жүрген екі шопан жоғалып кеткен. Оларды Төтенше жағдайлар министрлігінің құтқарушылары іздеп тапты. Екеуі де дін аман, деп хабарлайды Egemen.kz.
Республикалық жедел-құтқару жасағының мәліметінше, екі шопанның жоғалып кеткені туралы ақпарат 11 желтоқсан күні сағат 22:03-те түскен. Олар Алматы облысының Жамбыл ауданында бір отар қойды бағып жүрген. Жоғалып кеткендерді іздеуге Республикалық жедел-құтқару жасағының 10 адамнан тұратын жедел құтқару тобы шыққан. Базадан іздеу орнына дейінгі арақашықтық 138 км құрайды.
«Құтқарушылар шопандарды іздеуге сағат 02:40-та кірісті. Іздеу операциясы кезінде далада қатты жел, боран, аяз болды. Сағат 09.55-те бірінші шопан, сағат 10.15-те екінші шопан табылды. Екеуін де Жартас ауылы ауданындағы даладан таптық. Қатты аяз болса да адамдар үсіп қалмаған екен, олардың жағдайы жақсы, зардап шекпеген», делінген хабарламада.
Шопандар далада бағытын жоғалтып, адасып кеткен екен. Жоғалған шопанның біреуі 1984 жылғы, екіншісі 1982 жылы туған.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
