– Қызылордалық боксшы Қамшыбек Қоңқабаев спорттық мансабында екінші мәрте Жазғы Олимпиада ойындарына қатысуға мүмкіндік алып отыр. Қызылордалық спортшы дүбірлі додаға жолдаманы былтыр Қытайдың Ханчжоу қаласында өткен ХІХ Жазғы Азия ойындарында иеленді. Сол жолы ол күміс медаль алып, жанкүйерге қуаныш сыйлаған еді.
Қамшыбек Қоңқабаев 1991 жылы 18 қараша күні Қызылорда қаласында дүниеге келген. Қазірге дейін Токио Олимпиадасының қола жүлдегер болса, әлем чемпионатында 2017, 2019 жылдарда екі мәрте күміс медаль иегері атанды. Сондай-ақ 2022 жылы Жазғы Азия ойындарының екінші орын алса, Азия чемпионатындатөрт мәрте жүлдегерлер қатарынан көрінді. Оны 2006 жылдан бері жергілікті маман Сейітжан Төкенов жаттықтырады. Жеке бапкері әлі күнге дейін шәкіртін сындарлы сайыстарда шыңдап, сан алуан жарыстарда ақыл-кеңесін беріп келеді.
«Олимпиадаға дайындығымды пысықтадым. Біріккен оқу-жиындарына қатыстым. Алдымда үлкен мақсат бар. Париж Олимпиадасында жанкүйерлерімді жүлдемен қуантсам деймін. Әрбір уақытымды бос жіберген жоқпын. Сол жолда тынбай тер төктім», – дейді боксшы.
Ұлттық құраманың бас бапкері Мырзағали Айтжанов шәкіртіне зор үміт артып отырғанын жасырмайды. Төрт жыл бұрынғы жетістігін жақсартып, жеңіс тұғырынан көрінуге қауқары жететінін айтады.
Айта кетсек, облыс атынан грек-рим күресінен Айдос Сұлтанғали (60 келі), дзюдодан Абылайхан Жұбаназар (81 келі) және Нұрлыхан Шархан (100 келі) Парижге аттанады.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.