Шерзат Полатты өлтіру ісі бойынша басты сот отырысы жалғасуда

фото:qaz365.kz

Шерзат Полаттың ісідегі куәгер Эльмира Нұрбекова: Бір ер адам «қару алып, атып тастаймын» деп айқайлады

Талдықорғанда 16 жастағы Шерзат Полатты өлтіру ісі бойынша басты сот отырысы жалғасуда. Бүгін бұл іс бойынша куәгер Эльмира Нұрбекова түсініктеме берді.

Эльмира Нұрбекова бүгін сотталушылар орнында отырған жігіттердің кейбірін ғана танитынын айтты. Ол Дархан Әскентайдың таныстары мінген көліктердің бірінде «Қамажай» дүкеніне келген. Оның сөзінше, «Эйфория» кафесінде ол құрбысы Данамен және екі күн бұрын танысқан жігіттермен бірге мекеме жабылғанша отырған. Даяшы шығуларын өтінген соң, Нұрбекова, Дана, Нұрқияс Ілиясов пен Равиль Сакиев қара түсті көлікке мініп, дүкенге барған.

«Дүкеннің алдында жігіттер тұрды, бәрі амандасып, сөйлесіп тұрды. Мен Данаға дүкеннен темекі алайық деп ұсыныс жасадым. Машинадан шығып, топтың арасымен өткенде бетінде көгерген ізі бар, не сызат, не қан екенін ажырата алмаған бір жігітті көрдім.

Дүкенге кірдік, ішінде бейтаныс екі жігіт пен тағы бір ер адам тұрды. Біз оны сатушы шығар деп ойладық. Темекі сатуды сұрадық, ол: «Жоқ, сатпаймын, қазір қару алып, атып тастаймын», – деді. Біз дүкеннен шығып кеттік. Дүкеннің қасында тағы бір қара көлік тұрды. Мен сол көлікке барып, қасында тұрдым», – деді Нұрбекова.

Оның айтуынша, сатушы дүкенді жауып тастаған, біреу есікті теуіп жіберген. Сол сәтте біреу Нұрқиясты ұрып жібергенін көріп, оның құлағанын байқайды. Содан кейін сұр жейде киген бір жігіт сыртқа жүгіріп шыққан.

«Ол жүгіріп шығып, айқайлап, әуеге оқ атты. Сосын жігіттерге қарай қаруын кезеніп, екі қадам шегініп, тағы бір рет атты.
Мен Равильді ұстап алып, “ұрсыспаңдаршы, өтінемін” деп, сүйреп әкетуге тырыстым. Қолымнан келгенше тыныштандырмақ болдым. Бірақ ол қолымнан сытылып шығып, төбелес болып жатқан жаққа жүгіріп кетті. Ал мен Дана тұрған көлікке қарай кеттім. Біз екеуміз не істерімізді білмей тұрдық.

Содан кейін бір әйелдің көмек сұраған даусын естідім. Жол жаққа жүгіріп бардым, не болып жатқанын түсіне алмадым, бәрі жүгіріп жүрді. Қара күртеше киген бір жігітті ұстап алып, «тынышталыңдаршы» деп, артқа тартып едім. Сол сәтте мелшиіп тұрып қалдым. Сұр жейде немесе кофта киген бір жігіт жерде жатты, ес-түссіз сияқты болды. Мен де не істерімді білмей, қатып қалдым, ештеңе істей алмадым, ештеңе айта алмадым», – деп баяндады Эльмира Нұрбекова.
Куәгер атыс шығарған адамды көргенін жеткізді, бірақ есімін айтуға үлгермеді. Сот төрағасы жұмыс күні аяқталған соң, Нұрбекованың сұрақ-жауап процесін тоқтатты. Енді ол келесі отырыста, 28 сәуірде қайта жалғасады. Сол күні куәгерге қорғау тарабы өз сұрақтарын қояды. Дәл сол күні Эльмира Нұрбекова оқ атқан адамның есімін атауі мүмкін.