Фото: KYZYLORDA mobfest
«KYZYLORDA mobfest» облыстық мобилографтар байқауы болып өтті. Заманауи цифрлық трендті дәріптеген бұл байқау Президент Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауы аясында ұйымдастырылды.
Қатысушылар жасанды интеллект мүмкіндіктерін пайдалана отырып, креативті бейнероликтер ұсынды. Қаламыздың бүгінгі келбеті мен болашақтағы даму бағытын шығармашылық тұрғыда бейнелеген жұмыстар қазылар алқасының жоғары бағасына ие болды.
Байқау қорытындысы бойынша Бас жүлде Қармақшы ауданы ауылдық клубының қызметкері Орынбек Құндыбековке, І орын Жаңақорған ауданы, Екпінді ауылы №166 орта мектебінің мұғалімі Ізбасар Әбдібековке бұйырса, ІІ орынды Арал ауданы №220 орта мектебінің оқушысы Бексұлтан Әбдуәли иеленді. Жүлделі ІІІ орын Қазалы көлік-техникалық колледжі студенті Арыстан Мұсағали мен «Болашақ» университетінің студенті Еркебұлан Қалдыбекке берілді. Сондай-ақ байқауға қатысып, белсенділік танытқан И.Әбдікәрімов атындағы Қызылорда аграрлық-техникалық колледжі студенттері Досымжан Төлеш, Нұрбол Бекбаевтар Алғыс хатпен марапатталды.
Аталмыш байқау жастардың шығармашылық әлеуетін шыңдап, цифрлық технологияны тиімді қолданудың жарқын үлгісін көрсетті. Қатысушылардың тың идеялары мен заманауи көзқарастары өңіріміздің цифрлық даму жолындағы нық қадамын айқындап берді.
Қазақстан Республикасының Ақпарат және қоғамдық даму министрлігінің Ақпарат комитетінде тіркеліп ақпараттық агенттігі ретінде № KZ44VPY00041335 куәлігі берілді.
