Елордада бөтеннің мүлкін бүлдіру және вандализм жағдайын анықтау, сол сияқты оның алдын алу жұмысы жүйелі түрде жүріп жатыр. Негізгі назар құқық бұзушылықтардың алдын алуға және қала инфрақұрылымы нысандарына ұқыпты қарау мәдениетін қалыптастыруға аударылған. Бұл туралы Астана қаласы әкімдігінің ресми сайты Полиция департаментіне сілтеме жасап хабарлайды.
Қалада бейнебақылау камералары орнатылып, қоғамдық орындарға тұрақты мониторинг жүргізіледі. Полиция қызметкерлері тұрғындар арасында түсіндіру жүргізіп, дауыс зорайтқыш құрылғылар мен дрондарды да пайдаланады. Олар азаматтарды қоғамдық тәртіпті сақтап, ортақ мүлікке ұқыпты қарауға шақырады.
Жыл басынан бері елордада мүлікті бүлдірудің 70-ке жуық жағдайы тіркелген. Көбіне аялдама павильондары, орындықтар, қоқыс жәшіктері мен жарнамалық құрылымдар бүлінеді.
Тұрғын үйлердің кіреберістеріндегі бейнебақылау камералары мен лифт жабдықтарын да жиі зақымдап кетеді.
Полиция бөтеннің мүлкін қасақана бүлдіргені үшін заңнамаға сай жауапқа тарту ісі қарастырылғанын ескертеді. Құқық бұзушылар келтірілген шығынды өтеуге, айыппұл төлеуге міндеттеледі, сондай-ақ әкімшілік қамауға да алынуы мүмкін.
Полиция департаменті азаматтарды мұндай жағдайларға бейжай қарамауға шақырады. Вандализм жағдайы байқасаңыз, дереу «102» нөміріне хабарлау қажет.
Сондай-ақ өскелең ұрпаққа тәрбие беруге, қоршаған орта мен ортақ мүлікке құрметпен қарау мәдениетін қалыптастыруға ерекше мән беру керек.